न्यूरोडय् सुथ न्हापां न्यय्गू लखसिबें अप्वः खुयायंकल
थौं सुथय् न्याताः इलंनिसें खुताः ई तकया दुने येँया न्यूरोड पाको लागाय् च्वंगु छखा छेँय् लुँ, धेबा, हिरा तयाः दयेकातःगु तिसाः नापं यानाः थ्यंमथ्यं न्यय्गू लखसिबें अप्वः सामान खुयाः यंकूगु दु । न्यूरोडया पाको लागाय् च्वंगु संकटा सहकारी लिक्कसं रेणु तण्डुकारया छेँय् अथे खुयाः यंकूगु खः ।
रेणु तण्डुकारया किजा भोला तण्डुकारं बिउगु जानकारी कथं उगु छेँय् नीगू तोला लुँ, हिरा तयाः दयेकातःगु तिसाः, नापं स्वीद्वः तका धेबा नापं खुयाः यंकूगु खः । रेणु थौं सुथय् न्याताः इलय् तीर्थयात्राय् वनीम्ह थः मनूयात येँया लुँ हितिइ तक तःवनेत छेँय्या लुखाय् तालं ग्वयाः वंगु खःसा थ्यंमथ्यं न्हय्ताः इलय् लिहां वःगु इलय् थःगु छेँय् तालं चायेकातःगु जुयाः क्वथाय् स्वःवंगु इलय् अथे धनमाल खुयाः यंकातःगु खः ।
तण्डुकारया मातं क्वथाया दराजया सेपय् तयातःगु तिसाः, धेबा खुयाः यंकाःतःगु खः । भोला तण्डुकारं बियादीगु जानकारी कथं खुँतय्सं खापा चायेकेगु लिसें खुइगु निंतिं छ्यःगु झिंच्यागू इञ्चया गल छपु त्वःता वंगु खः ।
उगु गल खुँतय्सं छ्यलीगु थें जाःगु हे खः धकाः प्रहरीं जानकारी बिउगु दु । अथे घटना जुइधुंकाः प्रहरी वयाः मुचुल्का यंकूगु दु । खुयाः यंकूगु उगु छँय् रेणु तण्डुकार याकःचा च्वनाः वयाच्वंगु खःसा छेँया छ्यलीइ पसः छगूयात बालं नं बियातःगु खः ।
