हत्याया विरुद्ध दलित सभासद्तपाखें संसद अवरुद्ध
कालिकोटय् मनवीर सुनारयात भुतु थिउगु धासें स्याःगु विरुद्ध दलित सभासद्तय्सं बिहीवाः व्यवस्थापिका संसद अवरुद्ध याःगु दु ।
वंगु मंसिर २४ गते कथित तःधंगु जातिया भुतुलिइ थिउगु धासें सुनारयात स्याःपिंत कारवाही मजूगु धासें दलित सभासदतय्सं संसदय् अवरोध याःगु खः । उगु अवरोध यायेगु झ्वलय् सत्तारुढ दलया दलित सभासद्तय् नं ब्वति दुगु खः ।
सभासद्तय्सं दोषियात कारवाही यायेमाःगु, सीम्ह सुनारया छेँजःयात क्षतिपूर्ति बिइमाःगु, सरकारं उगु घटनाया बारे लिसः बिइमाःगु नापं घटनाया छानबिन यायेत नं माग याःगु दु ।
कालिकोट जुविथा-४ स्थित छगू होटलय् सुनारं चुरोट च्याकेगु झ्वलय् भुति थिउगु धासें वयात कुटपिट यानाः स्याःगु खः ।
