आः चन्दा कायेगु नं बैंक मार्फत
येँ / (सन्ध्या टाइम्स) तराई लागाय् सकि्रय जुया-च्वंगु थीथी सशस्त्र पुचःतय्सं स्थानीय व्यापारीतय्के ध्यबा म्हयेगु न्हूगु तरिका लुइकूगु दु । न्हापा जूसा उमिसं व्यापारीतय्के नगद हे कया यंकीगु खःसा आः अथे मयासे थीथी बैंकय् चायेकातःगु थःपिनि खाताय् ध्यबा तयेके बीगु यानाहःगु खँ सीदुगु दु ।
उमिसं व्यापारीतय्त पौ च्वयाः थुलि ध्यबा माल धासें उगु ध्यबा फलाना बैंकया फलाना खाताय् तया बिउ धया हइगु खँ सी दुगु दु । बैंकया खाताय् तयातःगु ध्यबा उमिसं अप्वः यानाः एटीएमपाखें लिकायेगु यानाच्वंगु दु । अथे हे गुलिसिनं अज्याःगु ध्यबा भारतय् वनाः एटीएम छ्यलाः लिकायेगु यानाच्वंगु खँ नं धाःगु दु ।
तराईया छगू सशस्त्र पुचलं अनया छम्ह व्यापारीयात च्वयाहःगु पती येँया छगू निजी क्षेत्रं चायेकातःगु बैंकय् ध्यबा तया बिउ धकाः च्वयातःगु लूगु दु । आः उकिया बारे प्रशासनं बैंकय् वनाः छानबिन समेत यानाच्वंगु खँ नं धाःगु दु ।
न्हापा न्हापा थें 'क्याश' कायेबलय् आः खतरा दुगुलिं उमिसं अःपुगु उपायया रुपय् थ्व लँपु ज्वंगु खः । क्याश काः वनेबलय् लँय् अथवा ध्यबा बी धकाः सःतूम्ह मनुखं हे ज्वंका बीगु खतरा दुगुलिं उकिया पलेसा आः बैंक मार्फत कारोबार यायेगु न्हूगु लँपु ज्वंगु खँ धाःगु दु ।
