महत्वपूर्ण मन्त्रालय्त एमालें हे काइगु
सरकारय् ब्वति कायेत कांग्रेस व मधेशी जनअधिकार फोरमं थःगु पार्टीया नेतातय् नां क्वछी मफयाच्वंगु ईलय् एमालें धासाः महत्वपूर्ण मन्त्रालय्त थःगु हे पार्टीं कायेगु निर्णय याःगु दु ।
मंगलवाः च्वंगु एमाले शीर्ष नेतातय् अनौपचारिक बैठकं सरकार संचालनय् सहजताया निंतिं धासें महत्वपूर्ण मन्त्रालय्त थःगु हे पार्टीं कायेगु निर्णय याःगु ख: । बैठकं रक्षा, गृह व अर्थ मन्त्रालय् थःगु हे पार्टीं कायेगु निर्णय याःगु खः ।
पार्टी अध्यक्ष झलनाथ खनाल, वरिष्ठ नेता व प्रधानमन्त्री माधवकुमार नेपाल, प्रभावशाली नेता केपी शर्मा ओली दुथ्याःगु बैठकं मगंलवाः बहनी तक सरकार बिस्तार यायेगु बारे नं सहलह याःगु दु । अथेहे पार्टीया पाखें उप प्रधानमन्त्री नापं गृह मन्त्रालयया जिम्मेवारी केपी शर्मा ओली यात बीगु बारे नं सहलह जूगु खः ।
बैठक लिपा एमालें काग्रेस उपसभापति रामचन्द्र पौडेल नाप सरकार गठनया बारे सहलह याःगु खसाः एमाले नेता ओलीं याकचाः वनाः कांग्रेस सभापति गिरिजाप्रसाद कोइराला यात नापलानादीगु खः ।
