फुक्कं आन्दोलनत व्याख्यात्मक टिप्पणीया रुपय् तइगु
एनेकपा माओवादीया नेतृत्व न्हूगु संविधानया प्रस्तावनाय् जनयुद्ध खँग्वः मतयेत सहमत जुइवं मंगलवाः च्वंगु विवाद समाधान उपसमितिया बैठकय् थप स्वंगू विवादीत बिषयलय् सहमति जूगु दु ।
आः दयेकीगु न्हूगु संविधानय् फुक्क आन्दोलनया नां न्ह्यथनेगु सहमति जूसां नं जनयुद्धयात धाःसा 'सशस्त्र संघर्ष' धकाः न्ह्यथनेत माओवादी नेतृत्व सहमत जूगु खः । जनयुद्ध खँग्वयात धाःसा न्हूगु संविधानया व्याख्यात्मक टिप्पणीया रुपय् तयेत दलत सहमत जूगु दु ।
थ्वलिसें दलत न्हूगु संविधानया प्रस्तावना व संविधान संशोधनया व्यवस्थाया विषयसं दुगु विवादय् सहमतिलिक थ्यंगु दु । संविधानया प्रस्तावना व संविधान संशोधनया प्रावधानया विषयसं दलत दथुइ सहमति जुइधुंकूसां नं उकिया औपचारिक घोषणा याये धाःसा ल्यं दनि ।
दलत दथुइ न्हूगु संविधानय् जनयुद्ध लगायत फुक्क आन्दोलनया नां व व्याख्या संविधानया प्रस्तावनाय् न्ह्थनेगु वा संविधानया व्याख्यात्मक टिप्पणीया रुपय् तयेगु धइगु बिषयसं मतभेद दुगु खः ।
अथेहे संविधानया धारात हिलेमाःगु मागय् माओवादी दुगु खःसा हिउपा जुइ मजिउगुलिइ मेमेगु दलत दुगु हुनिं थुगु विषयसं धाःसा मंगलवाःया बैठकय् सहलह जूसां नं सहमतिइ मथ्यंगु नेतातय्सं जानकारी बिउगु दु ।
आः झिंछगू विवादीत बिषयसं सहमति जुइ ल्यँदनिसाः उपसमितिया मेगस् बैठक विहिवाः च्वनीगु जूगु दु ।
