'दबाव वःसां ज्यायात सतक विस्तारयात निरन्तरता बियादिसं'
प्रधानमन्त्री डा. बाबुराम भट्टराईं न्ह्याक्वः हे दवाब वःसां नं स्वनिगलय् सतक त्यलाः दयेकातःगु छेँ-टहरा थुनेगु ज्यायात निरन्तरता बिइत निर्देशन बियादीगु दु ।
प्रधानमन्त्री ज्याकू सिंहदरवारय् मंगलवाः सरोकारवालालिसेया सहलहसं प्रधानमन्त्री भट्टराईं अतिक्रमणय् लाःगु थासय् जुयाच्वंगु सतक विस्तार ज्या प्रशंसनिय जूगु धयादिसें न्ह्याक्वः हे दवाब वःसां नं उगु ज्या न्ह्याकाः च्वनेत निर्देशन बियादीगु खः ।
बैठकय् येँ महानगरपालिका व सतक विभागया प्रतिनिधि लिसे ट्राफिक प्रहरीं सतक विस्तार पनेत थःपिंत थीथी थासं दवाब व पंगः वयाच्वंगु बारे प्रधानमन्त्रीयात जानकारी बिउगु खः । महानगरीय ट्राफिक प्रहरी महाशाखाया प्रमुख प्रहरी नायव महानिरीक्षक गणेश राईं काठमाडौं उपत्यका नगर विकास समितिं तयार याःगु मापदण्डयात आधार तायेकाः थःपिंसं सतक विस्तार ज्यायात न्ह्यःने न्ह्याका च्वनाःगु जानकारी बियादीगु खः ।
प्रधानमन्त्रीं थुनेधुंकूगु थासय् सतक याकनं भिंकेज्या यायेत थःम्हं भौतिक योजना मन्त्रालययात निर्देशन बिइधुंकूगु नं बैठकय् जानकारी बियादीगु खः ।
अथेहे ट्राफिक मत दयेकेत, मू–मू चूकय् सिसिटिभी क्यामेरा जडान यायेगु लगायतया विषयसं नं बैठकय् सहलह जूगु नायव महानिरीक्षक राईं जानकारी बियादिल ।
