याकनं राष्ट्रिय सरकार नीस्वनेमाःगु नेतातय् धापू
थीथी राजनीतिक दलया नेतातय्सं राष्ट्रिय सरकार नीस्वनेगु लकस तयार यायेत प्रधानमन्त्री डा. बाबुराम भट्टराईं राजीनामा बियाः लँपु प्रशस्त यायेमाःगु खँय् बः बिउगु दु र
मंगलवाः येँय् ग्वसाःग्वःगु छगू साक्षात्कार ज्याझ्वलय् एकीकृत नेकपा (माओवादी)या छ्याञ्जे सिपी गजुरेलं राष्ट्रिय सरकारया निंतिं सुयागु नेतृत्वय् दलत दथुइ सहमति चूलाइ उगु हे पार्टीया नेतृत्वय् राष्ट्रिय सरकार नीस्वनेमाः धयादिसें वर्तमान प्रधानमन्त्रीया नेतृत्वय् राष्ट्रिय सरकार नीस्वने मफइगु धयादिल ।
नेपाली कांग्रेसया नेता दीपकुमार उपाध्यायं राष्ट्रिय सहमतिया सरकार नीस्वनेधुंकाः जक देय्या शान्ति प्रक्रिया व संविधान निर्माण लगायतया मेमेगु समस्या समाधान जुइगु जूगुलिं राष्ट्रिय सरकार नीस्वनेगु अपरिहार्य जुइधुंकूगु धयादिल ।
नेकपा (एमाले)या नेता युवराज ज्ञवालीं संसदया तःधंगु निगू शक्तित कांग्रेस–एमाले पिने दुगु सरकारं देय्या ज्वलन्त समस्या ज्यंकेत थाकुइगुलिं शान्ति व संविधानयात न्हापांगु प्राथमिकताय् तयाः राष्ट्रिय सरकार नीस्वनेगु लकस दयेकेत विलम्ब यायेमजिउगु धयादिल ।
