सरकारया न्युनतम साझा ज्याझ्व तयार
सरकारया न्युनतम साझा ज्याझ्व तयार जूगु दु । कार्यदलया मंगलवाः सुथय् च्वंगु बैठकं थुकीयात पूर्णता ब्यूसां दलया शीर्ष नेतात नाप सहलह यानाः तिनि अन्तिम निर्णय या:गु खः । कार्यदलया बैठक धुनेवं च्वंगु एमाले शीर्ष नेतातय् बैठक व लिपा कांग्रेस नाप जूगु सहलह धुंका सरकारया न्युनतक साझा ज्याझ्वलं पूर्णता काःगु खः ।
मंगलवाः एमाले संसदीय ज्याकू सिंहदरवारय् च्वंगु कार्यदलया बैठकय् नेपाली कांग्रेस, एमाले, मधेशी जनअधिकार फोरम व तराई लोकतान्त्रिक पार्टीया नेतातय्सं ब्वति काःगु खः । कार्यदलया बैठकं तयार यानाः ब्यूगु आधारय् शीर्ष नेतातय्सं स्वयाः न्युनतम साझा ज्याझ्वयात पारित यायेगु निर्णय जूगु खः । एमाले व कांग्रेस दथुइया बैठक लिपाः कांग्रेसं नं थुकी सहमति प्वंकूगु खँ एमाले सचिव शंकर पोखरेलंध धयादिल । थौं स्वताः ईलय् च्वनीगु एमालेयात समर्थन याइगु नीनिगु दलया बैठकं न्युनतम साझा ज्याझ्वयात अनुमोदन याइगु ज्याझ्व दु ।
सरकारया न्युनतकम साझा ज्याझ्वलय् राष्ट्रियता, राष्ट्रिय एकता व राष्ट्रिय हितया सम्बद्धन, संघीय लोकतान्त्रिक गणतन्त्रया कार्यान्वयन व राज्यया पुनसंरचना, दिगो शान्ति, शान्ति सुरक्षाया सुरक्षाया प्रत्याभुति, तात्कालिक राहत एवं पुननिर्माण, आर्थिक-सामाजिक रुपान्तरण लगायतया खँ दुथ्याकातःगु दु ।
कार्यदलया दुजः रघुजी पन्तया कथं एमालें पेश याःगु ज्याझ्वयात छुं नं परिमार्जन मयासें न्युनतम साझा ज्याझ्वयात कार्यदलं पारित याःगु ख: ।
अथेहे कार्यदलं राष्ट्रिय संयुक्त सरकार संचालनया सामान्य विधि व मान्यता, राजनीतिक समन्वय समिति व मन्त्रीतय् निंतिं आचारसंहिता नं पारित याःगु दु ।
कार्यदलया बैठक म्हिग च्वनीगु धासां बन्दया कारणं थौं सुथ्य जक च्वंगु खः ।
