पार्टीयात न्हूगु ढंगं पुनर्गठित यायेमाः : न्यौपाने
अखिल क्रान्तिकारीया पुलांम्ह नायः लेखनाथ न्यौपानें माओवादी मूल नेतृत्वं पार्टीया आधारभूत एजेण्डात त्वःता वनाच्वंगुलिं पार्टीयात हे न्हूगु ढंगं पुनर्गठित यायेमाःगु खँ धयादीगु दु ।
विराटनगरय् सोमवाः ग्वसाः ग्वःगु पत्रकार सम्मेलनय् माओवादी युवा नेता नापं जुयाच्वंम्ह न्यौपानें माओवादी दुने विदेशीया दलाली याइपिं नेतात जन्म जुयाच्वंगुलिं उकिं पार्टीयात हे पतनया लापुपाखे यंकेत्यंगु धयादिल ।पार्टी दुने दलाली यायेगु प्रवृत्ति अप्वयाः वनाच्वंगु धयादिसें नेता न्यौपानें उगु प्रवृत्तिया संरक्षण यायेगु ज्या पार्टी नायः प्रचण्डं हे यानाच्वंगु द्वपं नापं बियादिल ।
वय्कलं थ्वहे अवस्थाय् पार्टी छधी मजुइगु धयादिसें पार्टीयात एकतावद्ध दयेकेगु निंतिं न्हूगु ढंगं पुनर्गठन यायेमाःगु धयादिल । 'स्वार्थ मिलय् जूगु अवस्थाय् जक छगू थासय् च्वनेगु खः ।' वय्कलं धयादिल, 'सिद्धान्त, बिचाः, वर्ग फुक्क खँ ब्यागलं जुइधुंकां छगू हे थासय् च्वनेगुया छु नं औचित्य मदु ।'
वय्कलं वर्ग संघर्षया नितिं दयेकूगु जनमुक्ति सेनायात विघटन यायेगु, क्रान्तिकारी भूमिसुधारयात त्वःता अकुत सम्पत्ति मुंकेबिइगु थंज्याःगु सहमति यायेगु पार्टीया नीति अःखः जूगुलिं उकियात स्वीकार याये मफइगु स्पष्ट यानादिल ।
