कांग्रेसया बन्दं देय्न्यंकया जनजीवन प्रभावित
थीथी थासय् सवारीसाधान तोडफोड
तरुण दलया चितवन अध्यक्ष शिव पौडेलयात शहीद घोषणा यायेमाःगु व पौडेल विरुद्धया मुद्दा लितकायेमाःगु माग तयाः नेपाली कांग्रेसं सोमवाः याःगु नेपाल बन्दं देय्न्यंकया जनजीवन प्रभावित जूगु दु ।
शान्तिपूर्ण रुपं बन्द ताःलाकेत कांग्रेसं आव्हान याःसां सोमवाः सुथं निसें येँ लगायत थीथी थासय् तोडफोड जूगु दु । सुथय् निसें सतकय् टायर च्याकाः प्रदर्शन यानाच्वंपिं प्रदर्शनकारीतय्सं सवारी साधन लगायत सरकारी ज्याकूथी तोडफोड याःगु दु ।
प्रदर्शनकारीतय्सं चावहिली छगः ट्याङकरय् व पुतलिसतकय् छगः गाडीइ तोडफोड याःगु दुसाः गौशाला बा. १. ज. १६३ नम्बरया ट्याक्सी व तिलगंगाय् बा. ९. च. ३७२० नम्बरया निजी गाडी च्याकाबिउगु दु । अथेहे यलया गोर्कोय् बा. ८. च. ३७८९ नम्बरया टाटा मोबाइलय् तोडफोड याःगु दु ।
उखे काभ्रेया छगू पसलय् तोडफोड याःगु दुसाः नेपालगञ्ज, गोरखा, वीरगञ्ज व सुर्खेतय् नं सवारी साधानय् तोडफोड याःगु दु । प्रहरीं जबर्जस्ती बन्द यायेत स्वःगु धासें येँय् झिंनिम्ह प्रदर्शनकारीतय्त ज्वंगु दु ।
बन्दया हुनिं चिहाकःगु व ताहाकःगु दुरीया सवारी साधन ठप्प जूगु दु । अथेहे शिक्षण संस्था, कालकारखाना, उद्योग व्यवसाय पूर्ण रुपं प्रभावित जूगु दु ।
कांग्रेसं आइतवाः न्हिनय् ३ बजे तक नं मदुम्ह पौडेलयात शहीद घोषणा व मुद्दा लितमकाःसा सोमवाः बन्द यायेगु ख्याच्वः बिउगु खः । सरकारं शनिवाः हे मदुम्ह पौडेलया छेँजःयात झिगू लख व हत्याया छानबिन यायेत न्यायिक छानबिन आयोग नीस्वंगु खः । सरकारं कांग्रेसया उगु निगू माग पूवंकेमफइगु धायेवं बन्द आव्हान याःगु खः ।
वंगु मंसिर २० गते चितवन कारागार दुने जूगु आक्रमणय् लानाः पौडेल मदुगु खः ।
