न्हूगु संविधानय् निगू सदनात्मक व्यवस्था जुइगु

संविधानसभा अन्तरगत संवैधानिक समितिं भावी व्यवस्थापिका निगू सदनात्मक जुइगु विषयलय् सहमति याःगु दु । तर उकिया संरचना छु–गज्यागु जुइगु धइगु विषयलय् धाःसा लिपा सहलह यानाः लिच्वलय् थ्यनीगु नेतातय्सं धाःगु दु ।

समितिया ज्याकु सिंहदरवारय् शुक्रवाः सुथय् च्वंगु बैठकय् विवाद समाधान उपसमितिं यानातःगु निर्णयत अनुमोदन यायेगु प्रक्रिया नापं न्ह्याकेगु निर्णय याःगु दु । विवाद समाधान उपसमितिं क्वछिउगु विषयलयात अनुमोदनया प्रकृयाय् यंकेगु निर्णय याःगु समितिया सभापति निलाम्बर आचार्यं जानकारी बियादिल । सभापति आचार्यया कथं थनिंनिसें संविधान च्वयेगु न्हुगु चरण न्ह्याःगु दु ।

राज्यया पुनर्संरचना बाहेक विवाद समाधान उपसमितिं क्वछिइधुंकूगु विषययात अनुमोदन यानाः वनेगु व ल्यं दुगु विषययात मतदानया प्रक्रियाय् यंकेगु जानकारी नं सभापति आचार्यं बियादिल ।

विवाद समाधान उपसमितिं निसः व झिगू मध्ये आतक सच्छि व गुइप्यंगु विषयसं सहमति चूलाकेधुंकूगु दु । सहमति चूलाःगु निगू तिहाइ स्वयां अप्व विषयलय् माओवादी थःगु अडानपाखें लिचिउगु खः । सर्वाधिक विवादय् दुगु निर्वाचन प्रणाली व सम्पति लिसे भूमिया हदबन्दीया विषयलय् नं माओवादीं थःगु अडान त्वःतेवं उगु विषयलय् सहजतापूर्वक सहमति जूगु खः ।

वइगु पुस १५ गते दुने हे राज्य पुनर्संरचना बाहेकया ल्यं दुगु विषयलय् सहमित यायेगु संविधानसभाया लिपांगु कार्यतालिका कथं विवाद समाधान उपसमितिं जटिल विषयलय् सहमति यानाः वनेगु व संवैधानिक समितिं अनुमोदन यानाः वनेगु ज्यायात तच्वयेकुगु खः ।