संघिय लिम्बुवान नाप जूगु वार्ता असफल
राज्य पुनर्संरचना आयोगय् थःगु दलया प्रतिनिधित्व माग यानाच्वंगु संघिय लिम्बुवान राज्य परिषद् (सञ्जुहाङ पालुङवा पुचः) व सरकार दथुइया वार्ता असफल जूगु दु । शान्ति मन्त्रालयसं शुक्रवाः जूगु वार्ताय् सरकारं गृहकार्य मयासे वःगुलिं वार्ता निष्कर्षय् थ्यने मफुगु परिषद्या केन्द्रीय दुजः एलबी पालुङवां जानकारी बियादिल ।
'आयोगय् जिमिगु प्रतिनिधित्व याकेगु सरकारया पूर्व सहमति खः' वय्कलं धयादिल, 'जिमिगु मागय् वय्कपिं (सरकार) तयारी बिना प्रस्तुत जुल ।'
निगुलिं पक्षदथुइ थःथवय् समझदारीइ हाकनं वार्ता यायेगु सहमति जूगु पालुङवां जानकारी बियादिल । परिषदपाखें वार्ताया नेतृत्व नायः सञ्जुहाङ पालुङवां याःगु खःसा सरकारी वार्ता पुचःया नेतृत्व शान्ति लिसे पुननिर्माण मन्त्री सत्या पहाडीं याःगु खः ।
पूर्व सहमति कथं राज्य पुनर्संरचना आयोगय् थःगु दलया प्रतिनिधित्व मजूगु धासें परिषद्ं अरुण पूर्वया गुंगु जिल्ला अनिश्चितकालीन बन्द याःगु खः । सरकारं आश्वासन पूवंकेगु धायेवं निन्हु न्ह्यः बन्द स्थगित यानाः परिषद् वार्ताय् च्वनेत तयार जूगु खः ।
