थःगु कार्यकालय् च्यागः जहाज हयेगु मन्त्री विष्टया दावी
पर्यटन व नागरिक उड्ययन मन्त्री लोकेन्द्र विष्टं थःगु कार्यकाल दुने च्यागः जहाज हयेगु खँ धायादीगु दु । बिहीवाः येँ जूगु पर्यटन दँ अभियान साक्षात्कार ज्याझ्वलय् वय्कलं थथे धयादीगु खः ।
वय्कलं जहाज न्यायेगु सम्झौता सार्वजनिक व पारदर्शी कथं यायेगु व दक्व प्रकिया पूवंक यायेगु अले कमिसन चलखेल जुइके मबिइकेगु खँ धायादिल । नापं चिनियाँ जहाज उपयुक्त मजूगु धाःगु बुखँया खण्डन यानादिसें वय्कलं प्राविधिकतय्सं उपयुक्त जूगु धकाः प्रतिवेदन बिइगु कथं हे चिनियाँ जहाज न्यायेगु ज्याझ्व न्ह्याःगु धयादिल । प्रधानमन्त्री व अर्थ मन्त्रालय नाप सहमति कयाः जहाज न्यायेगु निंतिं चिनियाँ पक्षनाप सम्झौता याये धुंकूगु खुलासा नं वय्कलं यानादिल ।
ज्याझ्वलय् मन्त्री विष्टं न्हूगु विमानस्थल द्येकेगु व सुधार यायेगु योजना दुगु खँ कनादिल । थुगु आर्थिक दँय् पहाडी जिल्लाय् गुंगू थासय् विमानस्थल कालो पत्रे जुइगु, पोखरा विमानस्थल द्येकेगु ज्या क्वचाइगु, निजगढय् विमानस्थल द्येकेगु ज्या न्ह्याकेगु जानकारी बियादिल । नापं नागिडाडा व पाँचखालय् विमानस्थल द्येकेत उपयुक्त जू-मजू विषयलय् अध्ययन यायेत समिति नीस्वना उकिया प्रतिवेदनया आधारय् विमानस्थल दयेकेगु ज्या न्ह्याकेगु खँ न्ह्यथनादिल ।
