सरकारय् वनीपिं लोभीपापीत

नेकपा एमाले या वरिष्ठ नेता माधव नेपालया नेतृत्वय् गठित सरकारं अझ नं पूर्णता काये मफुनि । सरकारय् वनीपिं मन्त्रीतय् नांधलः तयार यायेगु खँय् पार्टीतय् दथुइ ब्वलनाच्वंगु विवादं नेपाःया राजनीतिक पार्टीत पदया गुलि जक लोभी धइगु खँ हानं छक्वः पुष्टि जूगु दु । मेगु ला खँ हे त्वःते स्वयम् कांग्रेस थेंज्याःगु तःक्वःमछि सरकारय् वनेधुंकूगु पार्टी दुने तकं सुयागु नेतृत्वय् सरकारय् वनेगु धइगु खँय् घोर विवाद पिहां वःगु दु । उकी निगूगु पुस्ताया नेतात जक मखु सभापति गिरिजाप्रसाद कोइराला थेंज्याःम्ह वयोवृद्ध नेता तकं थः हे म्ह्याय्या नेतृत्वय् सरकार दयेके दःसा जिउ धइगु लोभय् तक्यनाः मुक्कं सरकार गठनया ज्यायात हे अवरुद्ध यानाच्वंगु दु । उखे मधेशी जनअधिकार फोरम ला थ्वहे सरकारय् वनेगु खँयात कयाः निकू कुचा हे जुइगु खः लाकि धइगु अवस्थाय् थ्यनेधुंकूगु जुल । पाय्छि उकथं हे तमलोपा व सद्भावना पार्टी दुने नं थ्वहे विवादं हा कया हयेधुंकूगु दु । उमिगु थ्वहे विवादं यानाः आः तक सरकार गठनया ज्या न्ह्याये फुगु मदुनि । थज्याःगु अस्थिर पार्टीया अस्थिरिपं नेतात ज्वनाः सरकार चले यायेगु प्रधानमन्त्रीया लागिं धाथें नं अःपुगु ज्या जुइ मखु । थुकिं यानाः २२ पार्टीया समर्थन दुगु सरकार खयां नं थ्व सरकार २२ गुलिं हे पार्टीया सरकार विरोधी गुटया आक्रमणया शिकार जुइगु सम्भावना दु । सरकार गठनया सवालय् वयाच्वंगु थ्व कचवनं यानाः नेपाःया राजनीतिक पार्टी व उकिया नेतातय्सं देशय् वःगु लोकतान्त्रिक हिउपाः संघीय व्यवस्था गणतन्त्र व स्थायी शान्ति थेंज्याःगु विषययात ठेगे याये फइ धइगु खँय् हे आम जनतां शंका याना हःगु दु ।

More Stories Like this