बन्दं सरकार गठनया ज्या प्रभावित
येँ / (सन्ध्या टाइम्स) नेवाः स्वायत्त राज्य मंकाः सघर्ष समितिया बन्दया कारणं थौं जुइमाःगु मन्त्रिमण्डल गठन प्रक्रिया नं अवरुद्ध जूगु दु ।
मन्त्रिमण्डलयात पूर्णता बीगु निंतिं थौं च्वने धाःगु २२ दलया मंकाः बैठक नं च्वने मफुत ।
अथे हे थौंया बैठकय् सरकार संचालनया निंतिं एमालें तयार याःगु ५० बुँदे मंकाः ज्याझ्वःया बारे एमाले-काग्रेस सहित नीनिगू दल दथुइ सहलह यायेगु ग्वसाः एमालें दयेकातःगु खः । तर बन्दया कारणं उगु ज्याझ्वः प्रभावित जूगुलिं सरकार गठन प्रक्रिया नं छन्हु निन्हु लिबाइगु जूगु दु ।
अथे हे सरकार संचालन यायेगु निंतिं न्युनतम मंकाः ज्याझ्वः तयार यायेत गठन यानातःगु प्यंगू दल सम्मिलित कार्यदलया बैठक नं थौं च्वने मफुत । उगु कार्यदलं तयार याःगु मंकाः ज्याझ्वःया बारे सहलह यानाः मन्त्रिमण्डलया विस्तार यायेगु ग्वसाः दुगु खः ।
उखे कांग्रेसपाखें सु सु मन्त्री दयेकेगु धकाः थौं च्वनेत्यंगु बैठक नं प्रभावित जूगु दु । अथे खःसां कांग्रेसया नेतात बल्लतल्ल सानेपा थ्यंकाः बैठक धाःसा च्वंगु खँ सीदुगु दु । मन्त्रिमण्डलय् वनीपिनि नां धलः धकाः सभापति गिरिजाप्रसाद कोइराला कार्यवाहक सभापति सुशील कोइराला व वरिष्ठ नेता देउवां बिस्कं बिस्कं हे दयेकातःगुलिं थौं बैठक च्वनाः उकियात अन्तिम रुप बीगु ग्वसाः दुगु खः ।
उखे थौं बन्दया कारणं संसद बैठक नं कन्हय् जक च्वनेगु च्वनीगु जूगु दु ।
