सुनितायात धर्मादित्य सिरपाः लःल्हात
यल / (सन्ध्या टाइम्स) मांभाय् पुचः यलपाखें बीगु धर्मादित्य धर्माचार्य सिरपाः शनिवाः नेपालभाषाया च्वमि सुनिता मानन्धरयात लःल्हात । थुगुसी थ्व सिरपाः बिउगु च्याक्वःगु खः । सिरपाः न्याद्वः व छतका दां व दसिपौ सहितया खः । बुद्धधर्म व दर्शनया विषयय् च्वसु च्वयाः यानादीगु ज्याया कदर यासें मानन्धरयात उगु सिरपाः बिउगु खः ।
ज्याझ्वलय् नेवाः देय् दबूया नायः नरेश ताम्रकारं सिरपाः लःल्हानादीगु खः । लिसें उगु हे ज्याझ्वलय् दशकौं न्ह्यवंनिसें नेपालभाषाया सेवा यानादीम्ह भाषासेवी रोहिणीबहादुर कायस्थयात नं हनेज्या जूगु खः ।
ज्याझ्वलय् डा. पुष्पराज राजकर्णिकारं सिरपाःया बारे कनादीगु खःसा रामहरि कपालीं वय्कःपिनि म्हसीका बियादीगु खः ।
ज्याझ्वलय् न्ववासें दबूया नायः ताम्रकारं नेवाःतय्त गोलबन्द याना तयेगु निंतिं जेठ १८ गते नेवाः स्वायत्त प्रदेश नेपालमण्डल बन्द यायेत आह्वान यानादिल । संस्कृतिविद सत्यमोहन जोशीं मांभाय् पुचःपाखें नेपालभाषा एफ.एम. चले यायेगु निंतिं ग्वाहालि यायेत इनाप यानादिल ।
मांभाय् पुचःया नायः हिराकाजी महर्जनया सभापतित्वय् जूगु उगु ज्याझ्वलय् नेपालभाषा मंकाः खलः यलया नायः सुरेश प्रधान, विजय शाक्य, सुशिल महर्जनिपंसं नं नुगःखँ प्वंकादीगु खः ।
