लिम्बुवानया पूर्व बन्द, जनजीवन प्रभावित
संघीय लिम्बुवान राज्य परीषदं राज्य पुनर्संरचना आयोगय् थःपिनिगु प्रतिनिधित्व मयाकूगु धासें पूर्वया गुंगू जिल्लाय् याःगु अनिश्चितकालीन बन्दया कारण मंगलवाः स्वन्हुया दिं नं अनया जनजीवन प्रभावित जूगु दु ।
प्रशासनीक रुपय् बन्द चायेकेगु कुतःया निंतिं बिचाः दयेकूसां नं न्हापां राजनीतिक सहमति बिना मालीगु प्रशासनीक समाधानं ज्यामछिंगु अवस्था वयेफूगु प्रशासनीक नेतृत्वया च्यूताः दु । बन्दया कारण झापा, सुनसरी, मोरङ, इलाम, पाँचथर, ताप्लेजुङ, संखुवासभा, धनकुट्टा, ते¥हथुम लगायतया जिल्लाय् मंगलवाः नं यातायात, शैक्षिक संस्था, बजाः, कलकारखाना ठप्प जूगु खः । दुरु व तरकारीया गाडीत, प्रेस, एम्बुलेन्स, दमकल व मानवअधिकारया सवारी साधनयात धाःसा छु नं पंगः मथंगु धाःगु दु ।
२०६४ चैत्र ६ गते परिषद व सरकार दथुइ जूगु न्यागू बुँदे सहमतिया स्वंगू बुँदाय् राज्य पुनर्संरचना आयोग निर्माण यायेवलय् संघीय लिम्बुवान राज्य परिषद्या प्रतिनिधित्व याकीगु न्ह्यःथनातःसां नं बुँदा कार्यान्वयन मजूगु धासें परिषदं पूर्वया गुंगू जिल्लाय् आइतवाः निसें अनिश्चितकालिन आमहड्तालया आव्हान याःगु खः । आमहड्तालया कारण अरुण पूर्वया गुंगू जिल्लाया जनजीवन थप कष्टकर जुजुं वनाच्वंगु दु ।
