विवाद उपसमितिया बैठक : मिश्रित निर्वाचन प्रणालीइ सहमति
संवैधानिक समिति अन्तर्गतया विवाद समाधान उपसमितिया बैठकं मिश्रित निर्वाचन प्रणालीइ सहमति चूलाकूगु दु । उपसमितिया ज्याकू सिंहदरवारय् मंगलवाः सुथय् च्वंगु बैठकय् दलतदथुइ थज्याःगु सहमति जूगु खः ।
मिश्रित निर्वाचन प्रणाली उपयुक्त जूगु निष्कर्षय् दलत थ्यंसां नं समानुपातिक गुलि व प्रत्यक्ष गुलि प्रतिशत तयेगु धइगु विषयसं सहमति कायम यायेत धाःसा थप सहलह यायेल्यं दनीगु एमाले नायः झलनाथ खनालं जानकारी बियादिल । उपसमितिइ प्रत्यक्षय् खुइगू व समानुपातिकपाखे पिइगू वा प्रत्यक्ष व समानुपातिक निगुलिइ न्यय्गू-न्यय्गू प्रतिशतया प्रस्ताव वःगु खः ।
अथेहे बैठकं मतदाताया उमेर बारे नं क्वःछिउगु दु । उपसमिति बैठकय् दलत दथुइ जूगु सहमतिकथं झिंच्यादँ थ्यंपिं नेपाली नागरिकं निर्वाचनय् मतदानया अधिकार प्राप्त यायेफइ । मतदाताया उमेर हदया विषयलय् माओवादीं झिंखुदँ थ्यनेधुंकाः मतदान यायेदयेमाःगु अडान तयाः वयाच्वंगु खः ।
बैठकय् पूर्ण समानुपातिक निर्वाचन प्रणाली व मतदाताया उमेर झिंगुदँ जक जुइमाःगु निगुलिं अडानपाखें माओवादी लिचीलेवं दलत दथुइ सहमति जूगु खः ।
थनिंनिसें संविधानय् खनेदुगु विवादित विषय दथुइ सहलह यानाः क्वःछिनातःगु पूर्व प्रतिवद्धताकथं हे दलत थौं निर्वाचन प्रणालीया सामान्य खाकाय् सहमतिलिक्क थ्यंगु खः ।
राज्यया पुनर्संरचना बाहेक थीथी नीनिगू विवादित विषयलय् सहमति मालेगु भालाः दुगु उपसमितिं लिपांगु खुसिइ संविधानसभाया ई खुला तनेधुंकाः उगु हे कार्यतालिका कथं ज्या क्वचाइगु प्रतिवद्धतालिसे थनिंनिसें सहलहयात तीब्रता बिउगु खः । राज्यया शासकीय स्वरुप, निर्वाचन प्रणाली, न्याय प्रणाली व मौलिक हक लगायतया विषयलय् दुगु मतभेदत अन्त्यया निंतिं दलतय्सं थ्व इलय् अन्तरपार्टी व पार्टी-पार्टीत निगू पक्षिय लिसे बहुपक्षिय सहलहसं नं सक्रियता क्यंगु दु ।
