बौद्ध न्ह्यसः लिसः चिन्तनशीलं त्याकल
यल / (सन्ध्या टाइम्स) २५५३ क्वःगु बुद्ध जयन्तीया लसताय् युवक बौद्ध मण्डल नेपालया ग्वसालय् जेष्ठ ११ गते निसें न्ह्याःगु सुइन्हय्क्वःगु यल जिल्लाव्यापी बुद्ध व बुद्ध धर्म सम्बन्धी न्ह्यसः लिसः कासा वंगु शनिवाः क्वचाल ।
शनिवाः जूगु फाइनल कासाय् ११ ल्याः हयाः चिन्तनशील युवा समूह न्हाप लाःगु खः । उकथं हे कासाय् १० ल्याः हयाः दीपंकर परियत्ति केन्द्र लिउ ५ ल्याः हयाः अध्ययन मण्डल लियांलिउ व ३ ल्याः हयाः शाक्यिसंह परियत्ति शिक्षालय हःपाः सिरपाः त्याकेत ताःलाःगु दु ।
अथे हे प्रणित सिरपाः सुमंगल बौद्ध संघयात व भिंतुना सिरपाः नेपाल परम्परागत बौद्ध धर्म संघयात लाःगु खःसा ज्याझ्वःया मूपाहां पुलांम्ह मन्त्री बुद्धिराज बज्राचार्यं सिरपाः त्याकूपिं सकलें कासामिपिंत सिरपाः लःल्हानादीगु खः ।
ज्याझ्वलय् मू गुथिया नायः शान्तमान शाक्यं न्हाप जूगु पुचःयात म्हितं २००० तका लिउ लाःगु पुचःयात म्हितं १००० तका लियांलिउ लाःगु पुचःयात म्हितं ५०० तका व हःपाः लाःगु पुचःयात म्हितं २०० तका दां सिरपाः नं लःल्हानादीगु खः ।
अथे हे कासाय् आर्थिक व जिन्सी बियाः ग्वाहालि यानादीपिंत मू पाहांपाखें कदरपत्र लःल्हाःगु खःसा न्ह्यसः लिसः कासा मू गुथिया स्वम्ह संरक्षक व आजीवन जःपिंत नं मू पाहापाखें हनापौ लःल्हाःगु खः ।
संस्थाया अध्यक्ष सानुराजा शाक्यया सभापतित्वय् न्ह्याःगु उगु फाइनल कासाया निर्णायक मण्डल पुचलय् श्रद्धेय भिक्षु कौन्डण्य डा. बज्रराज शाक्य, अमिता धाख्वा व राजेश शाक्यिपं च्वनाः ग्वाहालि यानादीगु खः ।
