औद्योगिक प्रयोजनयात ब्यागलं भाः
आयल निगमं औद्योगिक प्रयोजनया नितिं डिजेलप्रति लिटरया गुइप्यतका व ९१ पैसा कायम यायेगु योजना दयेकूगु दु ।
निगमय् च्वंगु सञ्चालक समिति बैठकं डिजेलय् निगू कथंया मूल्य कायम यायेगु निर्णय याःगु ख । सार्वजनिक यातायात व सर्वसाधारण उपभोक्तां धासा न्ह्यखुतका लिटरय् हे डिजेल प्राप्त यायेफइगु जुगु दु । उलिं डिजेल मिबलय् निगमयात लिटरय् हे झिंच्यातका व ९१ पैसा घाटा दु ।
आवंनिसें उद्योगयात मिगु डिजेलय् निगमयात घाटा जुइमखु । डिजेल अभावं विकास परियोजना व औद्योगिक क्षेत्र समस्याय् लायेवं घाटा मजुइगु मूल्यय् मिगु निर्णय जुगु ख । विकास परियोजना व औद्योगिक क्षेत्रं तुगु भावं जुसां नं डिजेल बिइत माग यायेवं थज्यागु निर्णय याःगु निगमया कायम मुकायम कार्यकारी निर्देशक सुरेश चन्द्र अग्रवालं जानकारी बियादिल ।
थिकयेगु भावया डिजेल उद्योग, होटल, अस्पताल, सुपरमार्केट, कूटनीतिक नियोगं निगमया डिपोपाखें हे कायेफइ । वय्कया कथं छक्वया पालय् स्वद्ध लिटर स्वया अप्व जक डिजेल न्यायेदइ । थ्व डिजेल न्यायेत कम्पनी दर्ता जुगु भ्वं धासा निगमया डिपोय् उपलब्ध याकेमा । निगमं चिकं मबिवं मेलम्ची खानेपानी आयोजना, चिलिमे, माथिल्लो तामाकोसी लगायत परियोजनां समस्या लागु धयावयाच्वंगु ख । थौंनिसें देय्न्यंकया पम्पय् अनुगमन याइगु व डिपोपाखें व्यापार जुगु परिमाण लिसे पम्पय् जुगु व्यापार लिसे स्वाकेगु निगमया योजना दु ।
अन्तर्राष्ट्रिय बजाः कथं मूल्य समायोजन मजुइवं आयल निगमं पेट्रोलियम पदार्थ हयेत ऋण काइगु जुगु दु । निगमं चिकं हयेत नागरिक लगानी कोषपाखें डेढ अर्ब ऋण काइगु जुगु दु । अन्तर्राष्ट्रिय बजारय् कच्चा चिकं व डलरया मूल्यवृद्धिं निगमया घाटा छगु अर्ब नीखुगु करोड थ्यंगु दु ।
