संबैधानिक समितिया बैठकय् मौलिक हक बारे सहलह
संविधानसभा अन्तर्गतया संबैधानिक समितिया बैठकं राज्यया निर्देशक सिद्धान्त समितिया प्रतिवेदनया विषयलय् सहसह यानाः दोहरय् जूगु मौलिक हकया विषयलय् क्वःछीना वनेगु निर्णय याःगु दु ।
संविधान निर्माणया सवालय् संविधानसभां न्हूगु कार्यतालिका पारित यायेधुंकाः च्वंगु संबैधानिक समितिया बैठकं अज्याःगु निर्णय याःगु खः । बैठकय् दलतय्गु दथुइ उपसमितिइ मिलय् जूगु विषययात क्वःछीना वनेगु व मंसिर २७ गतेनिसें संविधान निर्माणया प्रक्रियायात ‘ब्रेक थ्रु’ यायेगु विषयलय् नापं सहलह जूगु नेतातय्सं धाःगु दु ।
संबैधानिक समितिया मेगु बैठक मंसिर २८ गते च्वनेगु नापं थौंया बैठकं क्वःछ्यूगु दु । संविधानसभां मौलिक हक व निर्देशक सिद्धान्तया विषयलय् दोहरय् जूगु विषययात मौलिक हक अन्तर्गत हे तयेगु पूर्वनिर्णय यायेधुंकूगुलिं अज्याःगु विषययात थ्वहे मंसिर २८ गते च्वनीगु बैठकं ज्यंकेमाःगु निर्णय जूगु समितिया सभापति नीलाम्बर आचार्यं जानकारी बियादिल ।
कांग्रेस संसदीय दलया नेता समितिया दुजः रामचन्द्र पौडेलं विवाद समाधान उपसमितिं थःगु प्रतिवेदनबारे बैठकयात जानकारी बिइगुया लिसलिसे निर्देशक सिद्धान्त व मौलिक हकया दथुइ दोहरय् जूगु विषय मिलय् यायेगु बारे सचिवालययापाखें प्रतिवेदन पेश जूगु धयादिल ।
