प्रधानसेनापतियात कारवाही यायेगु सहमति दु : झलनाथ
येँ / (सन्ध्या टाइम्स) प्रधानसेनापति कटवालयात माओवादी नेतृत्वया सरकारं कारवाही यायेगु निंतिं थम्हं नं सहमति बियागु खँ एमालेया अध्यक्ष झलनाथ खनालं धयादीगु दु ।
थौं सुथय् पर्वतय् स्थानीय पत्रकारतलिसे खँ ल्हायेगु झ्वलय् वय्कलं उगु खुलासा यानादीगु खः ।
पत्रकारतलिसे खँ ल्हासें वय्कलं 'माओवादीं हरेक ज्या यकःति रुपं यानाच्वंगुलिं लिपांगु इलय् थःपिंसं समर्थन मयानागु खँ कनादिसें धयादिलुमाओवादीं कारवाहीया अन्तिम इलय् जिनाप सहलह मयाः अथे जुयाः कारवाही प्रक्रियाय् समर्थन मयानागु खः ।'
माओवादीलिसे जूगु सहमतिइ प्रधानसेनापति रुक्मांगद कटवाल व सेकेण्ड म्यान जुयाच्वंम्ह रथी कुल-बहादुर निम्हेसितं चीकाः थर्ड म्यान जुयाच्वंम्ह मेम्ह रथी छत्रमान गुरुङयात प्रधानसेनापति दयेकेगु धकाः खँ जूगु जानकारी नं वय्कलं बियादिल । तर माओवादीं लिपा निर्णय याःबलय् थःपिनिगु सुझाव मकासे थः यसें यकःति निर्णय याःगुिलं वयात थम्हं समर्थन मयागु खँ नं वय्कलं कनादिल।
आःया सरकारय् माओवादीयात नं साथ कयाः न्ह्याः वनेगु खँ कनादिसें वय्कलं उकिया निंतिं थम्हं कुतः यानाच्वनागु जानकारी नं बियादिल । भाजु खनालं न्हापा माओवादीया नेतृत्वय् हे सरकार चले जुयाच्वंगु इलय् नं उकी कांग्रेसयात नं सहभागी यायेमाः धकाः बिचाः तयेगु यानादीगु खः ।
