बास्तविक सुकुम्बासीयात बैकल्पिक ब्यवस्था : भुमिसुधारमन्त्री
भुमिसुधार व ब्यवस्थामन्त्री भीमप्रसाद गौतमं स्वनिगःया वास्तविक सुकुम्बासीयात बैकल्पिक ब्यवस्था याना बस्ति चीकेगु धयादीगु दु । थौं जूगु रिपोर्टर्स क्लवया साक्षात्कार ज्याझ्वलय् मन्त्री गौतमं बास्तविक सुकुम्बासीयात च्वनेगु थाय् चूलाकाः खुसीया बस्ती चिइकेगु धयादीगु खः ।
वय्कलं २५ गते पुनरावेदन अदालतं ब्यूगु आदेश कथं सरकारं पलाः न्ह्याकेगु खँ धयादिल । गौतमं खुसी सिथय् सुकुम्बासीया नामय् धनी व पहुँचवालं कब्जा जमे यानाच्वगु दावी यानादिल नापं थःगु हे पार्टीया कार्यकता जूसां थनाः बस्ती खाली यायेगु बचं बियादिल । वय्कलं सुकुम्बासीया विवरण बिइत व वास्तविक सुकुम्बासीयागु छें भाडा सरकारं पुलाबिइगु प्रतिबद्धता नं व्यक्त याःगु दु । गौतमं वास्तविक सुकुम्बासीया बैकल्पिक ब्यवस्था यायेबलय् सुकुम्बासीत स्वनिगलं पिहां वनेत नं तयार जुइमाःगु धायादिल ।
मन्त्री गौतमया खँयात सुकुम्बासी पुचलं आपत्ति प्वंकूगु दु । नापं सुकुम्बासी संयुक्त मोर्चाया नायः दीपक राईं सरकारं दमनया नीति काःगु व सुकुम्बासीतय्सं नं कडा पलाः न्याकेगु चेतावनी बिउगु दु ।
कन्हय् सरकार व सुकुम्बासी दथुइ अदालतया इजलासय् सहलह जुइगु क्वछिनातःगु दु ।
