भारतीय राजदुत सुदं कोइराला व ओलीयात नापलात
येँ / (सन्ध्या टाइम्स) नेपाःया निंतिं भारतीय राजदूत राकेश सुदं देशय् न्हूगु सरकार गठन जूसां मन्त्रिमण्डल दयेके मफयाच्वंगु सन्दर्भयात कयाः थौं नेपाली कांग्रेसया सभापति गिरिजाप्रसाद कोइरालायात नाप लानादीगु दु ।
कोइराला निवास महाराजगाजय् कोइरालायात नापलायेगु झ्वलय् वय्कःपिनि दथुइ नेपाःया वर्तमान राजनीतिक अवस्था व सरकार गठनयात कयाः सहलह जूगु खँ धाःगु दु ।
उखे सूत्रं धाःसा वय्कःपिनि दथुइ सरकार गठन प्रकि्रयाय् जुयाच्वंगु ढिलाइ व सरकारय् माओवादीयात दुथ्याकेगु बारे सहलह जूगु खँ धाःगु दु ।
कोइराला व सूदया दथुइ जूगु थ्व नापलायेगु ज्यायात धाःसा राजनीतिक वृत्तय् अर्थपूर्ण रुपं काःगु दु । सूत्रया कथं भारतीय राजदूत सुद म्हिगः जक भारत वनाः लिहां वःगु खः ।
थौं हे राजदूत सुदं एमालेया नेता केपी ओलीयात नं नापलानादीगु दु । तर वय्कःपिनि दथुइ छु खँ जुल धइगु खँ धाःसा सीमदुनि ।
थ्वहे झ्वलय् सूत्र धाःकथं एमाले नेता ओली कन्हय् भारतय् वनेत्यंगु खँ धाःगु दुसा छुं न्हि लिपा हे नेपाली कांग्रेसया सभापति गिरिजाप्रसाद कोइराला नं भारतय् वनेत्यंगु खँ नं सूत्र धाःगु दु । सुद भारत वनाः लिहां वयेवं ओली व कोइरालां यायेत्यंगु भारत भ्रमणयात नेपालय् मेगु न्हूगु राजनीतिक घटनाक्रम विकास जुइत्यंगुया संकेत कथं थन विश्लेषण यानाहःगु दु ।
