पार्टी नेतृत्व जनविरोधी जूगु गजुरेलया दावी
एकीकृत (माओवादी)या सचिव सीपी गजुरेलं पार्टी नेतृत्व व पार्टीया हे प्रधानमन्त्रीं लगातार जनयुद्धया लक्ष्य व भावना अःखः ज्या यानाच्वंगु द्वपं बियादीगु दु ।
सर्लाहीया नवलपुरय् शनिवाः ग्वसाःग्वःगु पत्रकार सम्मेलनय् न्ववानादिसें गजुरेलं किसानया ल्हातं लाकाः कयाः सामन्तीया जग्गा लित बीगु, विघटनया शैलीइ जनुमक्ति सेनाया समायोजन याःगु, बिपा सम्झौता लगायतया जनविरोधी ज्या वर्तमान सरकार प्रमुख व पार्टी नेतृत्वपाखें जूगु धयादिसें थःगु पार्टी नेतृत्वया कुंखिनादिल ।
वर्तमान नेतृत्व शान्तिया ज्याय् जनमुक्ति सेनायात छगू प्रकारं विघटन यानाः छगू थान संविधान दयेकेगु कुतलय् न्ह्यःज्याःगु वय्कलं दावी यानादिल । अवैज्ञानिक सेना समायोजन व जनसंविधान मदयेकीगु जूगुलिं देय्या राजनीतिक परिस्थिति जटिल जुयाः वंगु धयादिसें वय्कलं जनयुद्धकालय् कब्जा यानातःगु सामन्तया जग्गा लित बिइत पार्टी नेतृत्व हे लगे जुयाच्वंगु धयादिल ।
अथेहे मेगू छगू प्रशंगय् आः दयेकीगु सरकारया नितिं पार्टीयापाखें पाः वःसा जनजातिया नापं प्रतिनिधित्व जुइकथं महासचिव रामबहादुर थापा 'बादल' प्रधानमन्त्रीया नितिं योग्य उम्मेदवार जुइगु हुइना भुइना पार्टीदुने न्ह्यानाच्वंगु इलय् वय्कलं नं उगु हे संकेत बयादिल ।
पार्टी तज्याइगु सम्भावनाबारे पत्रकारतय्गु न्ह्यसलय् वय्कलं न्ह्याक्वः हे विवाद जूसां नं थःपिनिगु पार्टी तःमज्याइगु व छापामार युद्धय् लिहांमवनेगु तर निर्णययात न्हूगु ढंगपाखें कार्यान्वयन यायेगु निष्कर्षय् थ्यंगु धयादिल ।
