निवाःया दुने स्ववियु निर्वाचन घोषणा जुइगु उपकुलपतिया दावी
त्रिभूवन विश्वविद्यालयया उपकुलपति प्रा. डा. हिरा बहादुर महर्जनं स्वतन्त्र विद्यार्थी युनियन (स्ववियु) निर्वाचनया मिति निवाःया दुने घोषणा जुइगु खँ धयादीगु दु। झिंस्वंगु विद्यार्थी संगठनं इलय् हे स्ववियुया निर्वाचन यायमाःगु माग तयाः लःल्हाःगु ज्ञापनपौ लःल्हानाकयादिसें उपकुलपति महर्जनं निवाःया दुने स्ववियु चुनावया मिति घोषणा यायेगु प्रतिबद्धता प्वंकादीगु खः ।
उपकुलपतिं थः नं फागुन १४ गतेतकया दुने निर्वाचन याकेगु पक्षय् दुगु न्ह्यथनादिसे व स्वयां न्ह्यः निर्वाचन प्रणालीइ सहमति यायेत विद्यार्थितय्त इनाप यानादिल ।
लिसलय् विद्यार्थी संगठनया प्रतिनिधितय्सं प्रणालीया विषयलय् थःपिंसं सहमति चुलाकेगु धासें चुनाव घोषणाया तयारी यायेत उपकुलपति महर्जनयात इनाप याःगु नेविसंघया न्वकु नैन सिंह महरं जानकारी बियादिल ।
नेविसंघ व अनेरास्ववियु वर्तमान प्रणालीपाखें हे निर्वाचन याकेमाःगु पक्षय् दुसाः अखिल क्रान्तीकारीं समानुपातिक प्रणाली माग याना वयाच्वंगु दु ।
