भियतनामय् नेपाःमिया उद्योग
येँ / (सन्ध्या टाइम्स) लगानीया निंतिं उपयुक्त थाय् व वातावरण मालाच्वंपिं नेपाःमि उद्यमीपिंसं दक्षिणपूर्वी एशियाया भियतनामयात थःगु गन्तव्य कथं लुइकूगु दु । नेपाःया स्वम्ह उद्यमी व्यवसायीपिंसं भियतनामय् तयारी लंया उद्योग चायेकूगु दु ।
नेपालय् उद्योग संचालनया वातावरण अनुकूल मजूगु व बारम्बार जुइगु मजदुर समस्या बन्द व हडतालया कारणं थनया तयारी पोशाक उद्योग बन्द यायेमाःगु धासें नेपाःया सुनिल ताम्राकार किरण टेम्पकर व जलाउद्दिनं भियतनामय् तयारी लंया उद्योग चायेकूगु खँ नेपाल तयारी पोशाक उद्योग संघया छम्ह पदाधिकारीं धयादीगु दु ।
छखे अमेरिकां थःगु कोटाय् क्वपाःगु व मेखे नेपाःया उद्योग व्यवसाय अस्थिर जुयाः श्रम समस्या नं ब्वलनाच्वंगु कारणं नेपाःमि व्यवसायीत उचित थाय् मालेगु झ्वलय् भितयतनाम वंगु खँ उम्ह पदाधिकारी कनादीगु दु ।
उमिसं थौं कन्हय् अन उद्योग बालं कयाः संचालन याना वयाच्वंगु दु ।
