'राजनीतिक दलत जनताप्रति इमानदार जूसा भ्रष्टाचार दी'
अख्तियार दुरुपयोग अनुसन्धान आयोगया सचिव भगवती काफ्लें राजनीतिक दलत जनताप्रति इमानदार जूसा भ्रष्टाचार दीगु खँ धयादीगु दु । भ्रष्टाचार विरुद्धया अन्तरार्ष्ट्रिय दिवसया सन्दर्भय् अख्तियार दुरुपयोग अनुसन्धान आयोगपाखें ग्वसाःग्वःगु ज्याझ्वलय् न्ववानादिसें अख्तियारया सचिव काफ्लें थज्याःगु खँ धयादीगु खः ।
राज्यपाखें गैरकानुनी रुपय् काःगु सुविधा पनेगु बारे सर्वोच्च अदालतं याःगु फैसलाया औपचारिक जानकारी दयेवं तुरुन्त कार्यान्वयन यायेगु खँ सचिव काफ्लें प्रतिबद्धता प्वंकादिल ।
अथेहे ज्याझ्वलय् नेपाल बार एशोसिएशनया नायः प्रेमबहादुर खड्कां थौंकन्हय् आमजनताय् अख्तियार हे दायित्वपाखें विमुख जुइत स्वःगु खः की धइथें जुयाच्वंगु धयादिल । सर्वोच्च अदालतं याःगु फैसला अःखः न्ववाइपिंत कारवाहीया दायरादुने हयेत वय्कलं आयोगयात सल्लाह नं बियादिल ।
ट्रान्सपरेन्सी इन्टरनेशनल नेपालया नायः विष्णुबहादुर केसीं ताःहाकःगु इलंनिसें अस्थिर राजनीतिपाखें न्ह्यानाच्वंगुलिं भ्रष्टाचार हाबी दुगु बिचाः प्वंकादिल ।
नेपाल पत्रकार महासंघया मूछ्याञ्जे ओम शर्मां महासंघं सुशासनयुक्त व भ्रष्टाचारमुक्त समाज स्वयेमास्ते वःगु धयादिसें भ्रष्टाचारविरुद्ध थौंनिसें हे सः थ्वयेकेत सञ्चारकर्मीतय्त सुझाव बियादिल ।
भ्रष्टाचार विरुद्धया अन्तर्राष्ट्रिय दिवस नेपालं सन् २००६ निसें हनेगु याःगु खः । सन् २००४ सं नेपाः भ्रष्टाचार म्हो जूगु देय्या गुइगू थासय् दुगुलिइ सन् २०१० सं थ्यंबलय् भ्रष्टाचार अप्वयाः सच्छि व न्यय्प्यंगूगु थासय् थ्यंगु खः ।
