सेनापतिया स्पष्टिकरण कायेगु खँय् खनालया सहमति दुगु खुलासा
नेकपा एमालेया अध्यक्ष झलनाथ खनालं प्रधानसेनापति रुक्मांग कटवालया स्पष्टिकरण कायेगु खँय् थम्ह सहमति प्वंकाःगु खँ धयादीगु दु । वयेकलं स्पष्टिकरण कायेगु खँय् सहमति प्वंकूसां कारवाही यायेगु खँय् धासाः असहमति प्वंकाःगु धयादिल ।
सोमवाः सुथय् पर्वत सदरमुकाम कुस्मा बजाःलय् ग्वसाःग्वःगु कार्यकर्ता नापलाय्गु ज्याझ्वलय् अध्यक्ष खनालं पार्टीं तःगु मध्यमार्गि धारय् माओवादी सहमत मजूगुलिं थःगु हे कारणं माओवादी सरकारं पिहांवनेमाःगु खँ धयादिल । विकल्प देयेकं देयेकं माओवादीं स्वेच्छिक रुपं सरकार त्वतूगु द्वपं बियादिल । प्रधानसेनापतिनाप स्पष्टीकरण कायेगु खँय् थम्हं सहमति प्वंकूसां नं पार्टीं कटवाल व खड्का निम्हेसितं अनिवार्य अवकास बीया स्वम्हम्ह व्यक्तियात प्रधानसेनापति देयेकेगु प्रस्ताव तयाःगु खँ खनालं कनादिल ।
वयेकलं माओवादी नेतृत्वया सरकारयात एमालें विखण्डन याःगु माओवादीया द्वपं आधारहीन जूगु धयादिल । माओवादीं अझ नं अपराधिक मनोवृत्ति पाखें भिन्न मजूगु धासें माओवादी सामाजिक फासिवादी प्रवृत्तिया हे कारणं सरकारं पिहांवनेमाःगु खँ अध्यक्ष खनालं धयादिल ।
