नेपालमण्डल ठप्प

छुं सामान्य झडप बाहेक बन्द शान्तिपूर्ण

नेवाः स्वायत्त प्रदेशया मागलिसे आव्हान जूगु थौं नेपालमण्डल बन्दखुन्हु सुथंनिसें बजाः व यातायात ठप्प जूगु दु । स्वनिगःया स्वंगुलिं शहरय् व्यापारीतय्सं स्वतःस्फुर्त रुपं पसः बन्द याःगु दुसा काभ्रे, मकवानपुर, दोलखा, रामेछाप व सिन्धुपाल्चोकय् नं बजार व्यवसाय बन्द जूगु दु ।

बन्दया हे कारणं भ्वँत, पन्ति, धौख्यः, येँ, यल चले जुइगु यातायात बन्द जूगु दुसा स्थानिय जनतां नीजि सवारी साधन थःथम्हं बन्द याना नेपालमण्डल बन्दयात समर्थन याःगु दु । बन्दं बाह्रबिसे, दोल्खा, त्रिशुली, पालुङ, टिष्टुङ, सिन्धुलीया बजाः लागा समेत ठप्प जुयाच्वंगु दु ।

थौं सुथय् ६ बजे निसें येँया थीथी थासं पिहां वःगु जुलुसं पसः तिकेगु लिसें लँय् चले याना वयाच्वंगु गाडी पनेगु ज्या याःगु खः । बन्दया क्रमय् नागढुंगाय् छुं यातायात तोडफोड या:गु दु । अथेहे, लुँमधिइ छगः मोटरसाइकल तोडफोड याःगु दुसा रत्नपार्कय् चायेकातःगु निगू होटेलया मेच टेबुल पिने हयाः च्याका बिउगु दु ।

छुं छुं थासय् सामान्य झडप जूगु दु । बन्दया झ्वलय् कुलेश्वरया फलफूल बजारय् छथ्वः मनूतय्सं बन्दकर्तातय्त आक्रमण यानाः प्यम्हेसित घाःपाः याका बिउगु दु । अन दुने च्वनाच्वंपिं ५०-६० म्ह मनूतय्सं उमित घेरे १५-२० म्ह बन्दकर्तातय्त दाःगु खः । उकी लानाः नेपालभाषाया कार्यकर्ता धर्म मुनिकार छ्यनय् च्यागू टाँका तये मायेक घाःपाः जूगु दु । अथे हे नरेश महर्जन, विनोद खड्गी व मेम्ह छम्ह नं घाःपाः जूगु दु । उगु आक्रमणयां छुं भचा लिपा बन्दकर्तातय् तःधंगु हे पुचः बजारय् दुहां वनाः आपालं पसः स्यंकेगु नापं अन पिने दिकातःगु १४-१५ गः गाडी तोडफोड याना बिल ।

उकथं हे चाबहीया गोपीकृष्ण हलय् नं २०-२५ म्ह मनूतय्सं बन्दकर्तातय्त आक्रमण याःगु दु । थ्व मनूतय्सं बन्दकर्तायात आक्रमण यायेत्यंबलय् बन्दकर्तां हे उमित दाया छ्वत । लिपा प्रहरीं नं आक्रमण याःवःपिंत हे संरक्षण यानाः टिका नगरकोटी लगायत न्याम्ह बन्दकर्तातय्त ज्वना यंकूगु दु ।

अथे हे महाराजगंजय् नं मोटरसाइकल गया वःपिं छथ्वः गुण्डा पुचःयात पनेवं उमिसं तरवार लिकयाः बन्दकर्तायात आक्रमण याःगु दु । उकी लानाः तामाङ राष्ट्रिय मुक्ति मोर्चाया दुजः वीरबहादुर तामाङ घाःपाः जूगु दु । लिपा बन्दकर्तातय्सं गुण्डा पुचःयात हे आक्रमण यासें उकिया नाइके शिखर गुरुङयात ज्वनाः प्रहरीयात बुझे याना बिल । लिसें उमिगु निगः मोटरसाइकल नं कब्जाय् काःगु दु ।

आन्दोलनकारीतय्सं ईमेज च्यानलया बा. २. च. ९४१० नं या भ्यान तोडफोड याना न्हाय्कं तछ्याना बिउगु दुसा कान्तिपुर एफएमका हेम सुवेदीया बा. २९. प. ४७७१ नं या मोटरसाईकल च्याका ब्यूगु दु । अथेहे,कान्तिपुर एफएमया हे कृष्णा पौडेलया बा. ८. प. ५८७२ नंया स्कुटर व सञ्चारकर्मी दिपक पाण्डेया मोटरसाइकल तोडफोड यानाब्यूगु दु । कालिमाटीइ नेपाल टेलिभिजनया छग: गाडीइ नं तोडफोड यानाब्यूगु दु ।

थौंया बन्दयात नेपाल आदिवासी जनजाति महासंघलिसे आवद्ध जनजाति संस्थात व नेकपा एकीकृत माओवादी निकट नेवाः राष्ट्रिय मुक्ति मोर्चां नं पूर्ण समर्थन याःगु दु । नेपाः राष्ट्रिय पार्टीं म्हिगः छगू वक्तव्य पिथनाः थौंया बन्दयात थःगु पूर्ण समर्थन दुगु खँ धाःगु दु ।

न्हूगु संविधानय् नेवाः स्वायत्त राज्य नीस्वनेमाःगु व सरकारं हःगु काठमाडौं उपत्यका शहरी विकास विधेयक लित कायेमाःगु माग यासें नेवाः स्वायत्त राज्य मंकाः संघर्ष समितिं नेपालमण्डल लागा बन्दया आह्वान या:गु ख: । नेवाः भूमि नेपालमण्डलय् नेवाः स्वशासनया अधिकार सुनिश्चित यायेत थौंया बन्द तसकं महत्वपूर्ण जुइगुलिं बन्दयात सफल यायेत समितिं सकसितं इनाप याःगु ख: ।

नेपालमण्डल बन्दया छुं दृश्य
किपा - जुजुमान महर्जन