युवा संघं कन्हय्या बन्द लितकल
युवा संघ नेपालं कन्हय् आव्हान यानातःगु स्वनिगः बन्दया ज्याझ्वः लितकाःगु दु । संघया ज्वनायंकातःपिं न्याम्ह कार्यकर्ता त्वःतुगु व युवा स्वरोजगार कोषया धेबा पारदर्शी यायेत सरकार सकारात्मक जूगुलिं बन्द लितकाःगु खँ संघं धाःगु दु ।
सोमवाः प्रधानमन्त्री डा. बाबुराम भट्टराई नाप सिंहदरवारस्थित प्रधानमन्त्रीया ज्याकूथी जूगु खँल्हबंलाय् प्रधानमन्त्रीं कोषया धेबा दुरुपयोग जूगु विषयलय् छानबिन यायेगु, दुरुपयोग याःपिंत कारवाही यायेगु व तत्कालया निंतिं कोषया परिचालन दिकेगु प्रतिबद्धता प्वंकेवं संघं बन्दया ज्याझ्वः लितकाःगु खः ।
उगु इलय् प्रधानमन्त्री भट्टराईं कोषय् राजनीतिक मनूत नियुक्त जूगुलिं विवाद वःगु धयादिसें याकन हे बिस्कं संयन्त्र दयेकाः कोषयात पारदर्शी दयेकेगु तयारी जुयाच्वंगु धयादीगु खः ।
युवा संघं कन्हय्या बन्द ज्याझ्वः लितकाःसां आर्थिक अनियमितता व भ्रष्टाचार विरुद्धया आन्दोलन धाःसा जारी हे जुइगु खँ धाःगु दु । संघं कोषया धेबा माओवादी नाप सःतिगु संस्थायात जक बिउगु धासें विरोधय् कुहांवःगु खः ।
