भ्रष्टाचार व अनियमितताप्रति शून्य सहनशीलता : प्रधानमन्त्री
प्रधानमन्त्री डा. बाबुराम भट्टराईं भ्रष्टाचार व अनियमितताप्रति शून्य सहनशीलता हे थःगु सरकारया न्हापांगु दायित्व जूगुलिं थःगु ध्यान उखेपाखे केन्द्रीत दुगु खँ धयादीगु दु ।
सार्वजनिक लेखा समितिपाखें सार्वजनिक संस्थान निर्देशन बोर्ड (नीस्वनेगु लिसे कार्य सञ्चालन) आदेश, २०६८ बारे जानकारी कायेत प्रधानमन्त्रीनाप काःगु स्पष्टीकरणया झ्वलय् वय्कलं उगु खँ धयादीगु खः । सरकारया स्वामित्वय् दुगु आपालं सार्वजनिक संस्थानत घाटाय् सञ्चालन जुयाच्वंगु व छुं बन्द जुयाच्वंगु अवस्थाय् बोर्ड आदेशं संस्थानया समग्र संरचनाय् सुधार हयेगु विश्वास नं वय्कलं प्वंकादिल ।
बैठकय् भौतिक योजना लिसे निर्माणमन्त्री हृदयेश त्रिपाठीं सरकारया आपालं लगानी जुइक जुइकं नं संस्थान प्रभावकारी रुपय् सञ्चालन जुइमफूगु खँ व्यवस्थापनया कमजोरी जूगु बिचाः प्वंकादिल ।
उगु इलय् मुख्य सचिव माधव घिमिरें थीथी सार्वजनिक संस्थानया ब्यागलं ब्यागलं सञ्चालन कार्यविधि दुगुलिं नं घाटाय् वनीगु स्थिति सिर्जना जूगु जुइफूगु धयादिसें संस्थानयात सञ्चालन यायेत छगू हे कथंया प्रकृया व सुधारया ज्याझ्वः हयेमाःगु खँ कुलादिल ।
बैठकय् समितिया सभापति रामकृष्ण यादवं सार्वजनिक संस्थानयात जनताया सेवा शर्तलिसे स्वानाः सञ्चालन यायेमाःगु व उकिया नितिं सुधारया आवश्यकता जूगुलिं सरकार गम्भीर जुइमाःगु धयादिल ।
बैठकय् न्ववाःपिं आपालं समितिया दुजःतय्सं घाटाय् वनीगु व बन्द गतिइ सञ्चालन जुयाच्वंगु सार्वजनिक संस्थानया पूर्णरुपय् सुधार यानाः न्ह्यःने न्ह्यायेगुया विकल्प मदुगु खँय् बः बियादिल ।
