नेपालमण्डल न्यंक मशाल जुलुस
नेवाःतय्गु भूमिइ नेवाः स्वशासन दयेमाःगु माग यासें कन्हय् जुइत्यंगु नेपालमण्डल बन्दया पूर्व सन्ध्याय् थौं बहनी नेपालमण्डलया थीथी थासय् व्यापक मशाल जुलुससहित शक्ति प्रदर्शन जूगु दु ।
येँय् जूगु मशाल जुलुस रत्नपार्कया शान्तिवाटिकां शुरु जुयाः येँया मू बजाः चाःहिलाः क्वचाःगु दु । मशाल जुलसय् नेवाः आन्दोलनया न्ह्यलुवाःत, राजनैतिक पार्टीया नेतालिसे शिक्षक, विद्यार्थी, व्यापारी व जनसाधारणया व्यापक सहभागीता दुगु खः । येँय् थँबही, कोटेश्वर व चाबहिलय् अलग अलग जुलुस पिकाःगु दु ।
यलय् मंगल बजारं मशाल जुलुस न्ह्यानाः गणबहाल, पुल्चोक चाःहिलाः लगनखेलय् क्वचाःगु दु । अथे हे ख्वप, थिमि, सक्व, फम्पि, भ्वँत, टिसटुंग, पालुंगलय् नं विशाल मशाल जुलुस पिकाःगु समाचार प्राप्त जूगु दु ।
(यल मंगलय् न्ह्याःगु मशाल जुलुस, किपा - सुविन श्रेष्ठ)
