च्याम्ह जर्नेलतय् म्याद तनीगु
माओवादी नेतृत्वया सरकारं अवकाश ब्यूपिं च्याम्ह जर्नेलतय् म्याद रक्षा मन्त्रालयं अप्वयेकीगु निर्णय याःगु दु ।
आइतवाः रक्षा मन्त्रालय् च्वंगु बैठकं उगु निर्णय याःगु ख: । रक्षा मन्त्री विद्या भण्डारीया अध्यक्षताय् च्वंगु बैठकय् रक्षा सचिव गणेश जोशी व श्रीधरप्रसाद पोखरेलं नं ब्वति कयादीगु खः । जर्नेलतय् पुर्नबहालीया खँय् रक्षामन्त्री भण्डारीं कानुन व्यवसायीत नापं सहलह यानादीगु खः ।
सैनीक मुख्यालयं म्याद तनेत सिफारिस यापिं जर्नेलत पवनबहादुर पाण्डे, रमेश बुढाथोकी, प्रदीपविक्रम राणा, नरेन्द्र रावल, रमेश विष्ट, शिवकुमार पौडेल, राजुप्रताप केसी, नरबहादुर कँडेलयात तत्कालीन रक्षामन्त्री रामबहादुर थापा बादलं चैत २ गते निसें लागू जुइ कथं अवकास ब्यूगु खः ।
लिपाः जर्नेलतय्सं चैत ९ गते सर्वोच्च अदालतय् मुद्दा दायर याःगु खः । मुद्दाय् न्यायाधिश कैलाशकुमार श्रेष्ठया एकल इजलासं च्याम्ह जर्नेलतय्त ज्याये लिहांवनेत आदेश ब्यूगु खः ।
लिपाः हाकनं सरकारं थ्व निर्णय बदर यायेत सर्वोच्च अदालतय् मुद्दा दायर याःगु खः । उगु मुद्दा आः नं सर्वोच्चय् न्हानाच्वंगु दु ।
