दोषीयात कारबाही यायेत सरकारयात निर्देशन
संसदया सार्वजनिक लेखा समितिं नेपाल वायुसेवा निगमया जहाजया पाटपुर्जा खुयाः यंकूगु विषयलय् छानबिन यानाः दोषीयात कारबाही यायेत सरकारयात निर्देशन ब्यूगु दु । सिंहदरबारय् च्वंगु समितिया बैठकय् पर्यटनमन्त्री लोकेन्द्र विष्ट, पर्यटन छ्याञ्जे व निगमया पदाधिकारीतय्त सःताः तंगु पाटपुर्जाया बारे थौं स्पष्टीकरण काःगु खः । पार्किङ याःगु थासं निगमया सामान खुयाः यंकूगु घटनाप्रति लेखां गम्भिर रुपं च्यूताः प्वंकूगु खः । निगमया फ्लाइ हवाई किट, घःचा लगायतया सामाग्री पार्किङ स्थलपाखें खुयाः यंकूगु खः ।
फ्लाई अ वे किट बक्स आपालं किलोया झ्यातूगु सामाग्री दुगुलिं विमानस्थल थेंज्याःगु संवदनशील क्षेत्रपाखें खुयाः यंकेधुंकाः उकियात गम्भिरता पूर्वक कायेत सरोकारवाला निकायत बाध्य जूगु दु । सामान खुयाः यंकूगु कारण निगमया नियमित उडान प्रभावित जूगुया लिसलिसे करोडौं तका घाटा जूगु दु । समितिया थ्व स्वयाः न्ह्यःया बैठकय् थ्व सम्वन्धि प्रतिवेदन याकनं लःल्हायेत निर्देशन ब्यूगु खः ।
