विवाद उपसमितिया वैठक क्वचाल
संवैधानिक समिति अन्तर्गतया विवाद समाधान उपसमितिं लिपांगु खुसिइ थप याःगु संविधानसभाया ई अवधिदुने हे संविधान च्वयेगु ज्या क्वचाइकथं कार्यतालिकायात लिपांगु रुप ब्यूगु दु । सिंहदरबारय् च्वंगु वैठकं संविधानसभा सचिवालयं क्वःछ्यगु कार्यतालिकाया मस्यौदायात लिपांगु रुप ब्यूगु खः ।
गुकिइ कथं वइगु पुस १५ गतेदुने शासकीय स्वरुप व निर्वाचन प्रणालीया विषयलय् दलतय्गु दथुइ खनेदुगु विवाद समाधान यायेधुंकीगु व फागुन १५ गतेदुने न्हापांगु एकीकृत मस्यौदा सार्वजनिक यायेगु कथं कार्यतालिकायात लिपांगु रुप ब्यूगु दु ।
अथेहे फागुन २३ गतेनिसें चैत १५ गतेतक्क संविधानया न्हापांगु मस्यौदायात जनताया दथुइ वनेगु व जनतालिसेया सहलहया आधारय् वःगु राय सुझाव कःघानातःगु लिपांगु मस्यौदा जेष्ठ १४ गते सार्वजनिक यायेगु कथं कार्यतालिका क्वःछ्यूगु नेतातय्सं धाःगु दु । दलतय्गु दथुइ शासकीय स्वरुप व निर्वाचन प्रणालीया विषयलय् खनेदुगु विवाद समाधानया नितिं थ्वहे मंसिर २१ गते हाकनं विवाद समाधान उपसमितिया वैठक च्वनेगु नं ज्याझ्वः क्वःछ्यूगु दु ।
