६५०० स्वयां अप्वः लडाकुत समायोजन यायेफइमखु : कांग्रेस
नेपाली कांग्रेसं ६५०० स्वयां अप्व माओवादी लडाकुतय्त सेनाय् समायोजन याये मफइगु खँ धाःगु दु । कांग्रेस पदाधिकारीतय्गु बिहीवाः च्वंगु मुँज्यां सेनाय् समायोजन जुइपिनि ल्याः पुलांगु सहमति स्वयां थकाये मफइगु निष्कर्ष पिकागु दु । माओवादी नाय पुष्पकमल दाहाल 'प्रचण्डं' थीथी शिविरया भ्रमणया झ्वलय् समायोजनय् वनीपिनिगु ल्याः बारे दलतलिसे सहलह यानाः थकायेफइगु धयाच्वंगु इलय् कांग्रेसया थुगु धारणा सार्वजनिक जूगु खः ।
कांग्रेस पदाधिकारी मुँज्यां समायोजनया ल्याः ९००० तक थ्यंकेफइगु धकाः माओवादी नायः प्रचण्डं बिउगु अभिव्यक्ति प्रति नं चिउता प्वंकूगु दु । कार्तिक १५ गतेया सहमति कथं सुरक्षा निकायया मापदण्ड कथं लडाकुया समायोजन जुइमाः धइगु विषयलय् कांग्रेस दृढ दुगु मुँज्या लिपा नेता अर्जुननरसिंह केसीं जानकारी बियादिल ।
कांग्रेसं संविधानसभाया ईया विषयलय् सर्वोच्च अदालतं याःगु फैसलायात धाःसा सकारात्मक फैसला जूगु खँ धाःगु दु । अथेहे पदाधिकारी मुँज्यां राज्य पुनर्संरचना आयोगलिसे समन्वय यानाः ज्या यायेत नरहरि आचार्यया नेतृत्वय् समिति नापं नीस्वंगु दु ।
थ्वहे दथुइ डा. प्रधानमन्त्री बाबुराम भट्टराई व नेपाली कांग्रेसया सभापति सुशील कोइराला दथुइ शान्ति प्रकृया व संविधान निर्माणया बारे बिहीवाः सुथय् सहलह जूगु दु । नापलाय् ज्याय् शिविर अनुगमनलिपा वर्गीकरण प्रकृया लिपांगु चरणय् थ्यंगु बारे प्रधानमन्त्री भट्टराईं कोईरालायात जानकारी बियादीगु खः ।
