नेपालय् भ्रष्टाचार अझ अप्वल

नेपालय् राजनीतिक हिउपा जूसां नं भ्रष्टाचार म्हो जुइगुया पलेसा झन् अप्वया वनाच्वंगु तथ्यांक छगू प्रतिवेदनं क्यंगु दु । नेपालय् भ्रष्टाचारया प्रभावकारी नियन्त्रण जुइमफया नेपाः भ्रष्टाचार याइगु देय्या धलखय् १५४गु ल्याःखय् लाःगु दु । न्हापाया दँय् हे नेपाः १४६गु थासय् दुगु खः । ट्रान्सप्यारेन्सी इन्टरन्यासनलं सार्वजनिक याःगु प्रतिवेदन कथं भ्रष्टाचारीया ल्याखय् वंगु दँ स्वया थुगुसी झन च्वये थहांवंगु खः । सरकार भ्रष्टाचार नियन्त्रण यायेत ताःमलाःगु, सार्वजनिक साधनया दुरुपयोग अप्वःगु लगायत प्रतिवेदनय् न्ह्यथनातःगु दु । सरकारी निकायत जनताप्रति जिम्मेवार मजूगु धासें उगु संस्थां थुकिं आर्थिक स्थायित्व प्राप्त मजुइगु खँ न्ह्यथंगु दु । १८३गु देय् मध्ये नेपाः १५४गु थासय लाःगु खः । दकले अप्व भ्रष्टाचार जुइगु देशय् सोमालिया लाःगु दु ।