'नेपाःयात पूर्ण रुपं लोडसेडिङ मुक्त यायेत अझ न्यादँ'
ऊर्जा राज्यमन्त्री सूर्यमान दोङ तामाङं देय्यात पूर्ण रुपं लोडसेडिङपाखें मुक्त यायेत अझ मेगु न्यादँ काइगु जानकारी बियादीगु दु । नेपाल तामाङ राष्ट्रिय महासंघपाखें बिहीवाः वय्कःया सम्मानय् ग्वसाःग्वःगु छगू ज्याझ्वलय् वय्कलं देय्यात लोडसेडिङ मुक्त राष्ट्र दयेकेत गहन अध्ययन यानाः स्पष्ट कार्ययोजना हयेमाःगु खँय् बः बियादिल । राज्यमन्त्री तामाङं मन्त्रालययात भ्रष्टाचार मुक्त दयेकेगु प्रतिबद्धता नापं प्वंकादिल ।
ज्याझ्वलय् स्काइ ग्रुप अफ कम्पनीया नायः बलबहादुर तामाङं पूर्ण रुपं लोडसेडिङया अवस्था अन्त्य मजूतल्ले देय्या आम उद्योगी व्यवसायीं ढुक्क जुयाः उद्योग सञ्चालन यायेगु लकस सिर्जना मजुइगुलिं सरकारं उखेपाखे ध्यान बिइमाःगु धयादिल । महासंघया दाँभरि ओमबहादुर मोक्तानं जनतां ययेकूगु शान्त व समृद्ध नेपाः निर्माणया निंतिं फुक्क सरोकारवाला पक्ष दृढताया लिसे न्ह्यःज्यायेमाःगु धयादिल ।
ज्याझ्वलय् महासंघया न्वकु साम्देन लामा, मूछ्याञ्जे श्याम तामाङ लगायतिपंसं तामाङ संस्कृति व परम्परायात ल्यंकाःतयेत फुक्क तामाङ समुदाय छधि-छप्पँ जुइमाःगु बिचाः प्वंकूगु खः ।
