थीथी ज्याझ्वः यानाः विश्व एड्स दिवस हन
निप्यक्वःगु विश्व एड्स दिवस थौं नेपालय् नं थीथी ज्याझ्वःया यानाः हंगु दु । 'एचआइभीया न्हूगु संक्रमण, भेदभाव लिसे एड्सया कारणं जुइगु मृत्युयात शून्यय् थ्यंकेनु' धइगु नारा लिसे विश्व एड्स दिवस हंगु खः ।
संयुक्त राष्ट्र संघीय एचआईभी एड्स ज्याझ्वलं छुं ई न्ह्यः एचआईभिया संक्रमणयात शून्यय् थ्यंकेगु न्यादँया रणनीति क्वःछिउगु खः । नेपाःया थीथी शहरय् थौं सचेतना र्याली, गोष्ठी लगायतया थीथी ज्याझ्वः यात । एचआईभिया न्हूम्ह संक्रमित जुइगु ल्याः छुं दँनिसें म्हो जुयाः वयाच्वंगु तथ्याङ्क दुसां नं नेपालय् प्रत्येक दिं म्होतिं खुम्ह मनू एचआईभीपाखें संक्रमित जुइगु यानाच्वंगु दु ।
राष्ट्रिय एड्स लिसे यौनरोग नियन्त्रण केन्द्रं बिउगु जानकारी कथं नेपालय् सन् १९८८सं न्हापांगु खुसिइ खनेदुगु उगु ल्वय्पाखें आतक म्होतिं झिंच्याद्वः मनूत संक्रमित जुइधुंकूगु दु । नेपालय् आः नं हरेक दिं छम्ह नवजात मचा एचआईभिपाखें संक्रमित जुइगु यानाच्वंगु व वार्षिक रुपय् म्होतिं न्याद्वः मनूत एचआईभी एड्सया कारण सीगु यानाच्वंगु दु ।
