प्रधानमन्त्री लगायतया पुचः लडाकु शिविर निरिक्षणय्

प्रधानमन्त्री डा. बाबुराम भट्टराई व एकीकृत नेकपा (माओवा)दी नायः पुष्पकमल दाहाल 'प्रचण्डं' लाडकूतय् थीथी शिविरया निरीक्षण न्ह्याकादीगु दु । वय्कःपिनि शिविर निरिक्षणया ज्याझ्वः तालबन्दपाखें सुरू जुयाः सुर्खेत दशरथपुरस्थित खुगूगु, रोल्पाया दहवनस्थित न्यागूगु व चितवनया शक्तिखोरय् दुगु निगूगु डिभिजनय् वया क्वचाइ ।

थ्वहे दथुइ प्रधानमन्त्री बाबुराम भटटराईं लडाकुत पार्टी व सरकारया नीति कथं न्ह्यःने न्ह्यायेमाःगु खँ धयादीगु दु । सुर्खेत दशरथपुरस्थित खुगूगु शिविर अनुगमनलिपा बुधवाः रोल्पास्थित न्यागूगु डिभिजन दहवन थ्यंकादीम्ह प्रधानमन्त्री भट्टराईं शान्ति प्रक्रियाया विकल्प मदुगु धयादिसें लडाकुत पार्टी व सरकारया नीति कथं न्ह्यःने न्ह्यायेमाःगु खँ न्ह्यथनादिल ।

वय्कलं शान्ति प्रक्रिया व संविधान निर्माण प्रक्रिया सफल यायेत माओवादी लडाकूतय् महत्वपूर्ण योगदान दुगु धयादिल । प्रधानमन्त्री भट्टराईं झिदँया जनयुद्ध निसें शान्ति निर्माण प्रक्रियाय् महत्वपूर्ण भूमिका निर्वाह याःपिं लडाकूतय्त सरकारं कदर याइगु धयादिसें जनसेनाया भविष्य उज्जवल दयेकेत थःम्हं कुत यायेगु प्रतिवद्धता प्वंकादिल ।

थ्वहे दथुइ न्यागूगु डिभिजन दहवनया घाःपाः, अपाङ्ग लगायतया लडाकूतय्सं छवाया अल्टिमेटम लिसेया मागपत्र प्रधानमन्त्री भट्टराई, माओवादी नायः प्रचण्ड, सेना समायोजन बिशेष समिति दुजः ईश्वर पोख्रेल व जनसेना प्रमुख नन्दकिशोर पुन 'पासाङ'यात लःल्हागु दु । घाःपाः अपाङ्ग लिसे प्रौढ लडाकुतय्गु पाखें घाःपाः लिसे अपाङ्ग सहयोद्धा संघ न्यागूगु डिभिजनया दुजः राजेन्द्र रावत क्षेत्रीं उगु मागपत्र लःल्हानादीगु खः ।

मागपत्र लःल्हायेधुंकाः प्रधानमन्त्री लगायतया पुचलं घाःपाः, अपाङ्ग लिसे प्रौढ लडाकुतय्गु माग प्रति थःपिं गम्भीर दुगु धासें निरिक्षण पुचः येँय् लिहांवयेवं हे उगु मागयात सम्बोधन यायेगु प्रतिवद्धता प्वंकूगु दु । गुंगू बुँदे मागपत्रय् दर्जाया आधारय् मखसें सेवाया आधारय् प्याकेज बिइमाःगु, घाःपाः लिसे अपाङ्गतय्त आजीवन पेनशनया व्यवस्था, स्वेच्छिक अवकासय् वनीपिं लडाकुतय्त राष्ट्रिय सम्मानया निंतिं कदर पत्रया व्यवस्था, लडाकु व झिंगुन्हुया जनआन्दोलनया सहिदतय्गु कृति व शालिक राष्ट्रिय संग्रहालयसं तयेमाःगु, स्वच्छिक अवकासय् वनीपिं लडाकु व उमिगु छेँजःयात निशुल्क स्वास्थ्य उपचारया व्यवस्था यायेमाःगु लगायतया माग न्ह्यथनातःगु दु ।

नेपाली सेनाया हेलिकप्टरपाखें जनसेनाया निरिक्षणया निंतिं प्रधानमन्त्री भट्टराई लिसे माओवादी नायः प्रचण्ड, सूचना लिसे संचारमन्त्री जयप्रकास गुप्ता, एमाले महासचिव ईश्वर पोखरेल व माओवादी लडाकूया कमाण्डर पासाङ लगायतया पुचः उखे पाखे वंगु खः ।