कांग्रेस पदाधिकारी मुँज्या स्थगित

भातृ संस्था विघटन लिपा न्ह्याःगु पार्टी विवाद समाधान यायेगु कुतः स्वरूप बुधवाः च्वने धयातःगु कांग्रेस पदाधिकारी मुँज्या नं स्थगित जुगु दु । मुँज्याय् माःगु तयारी मगागु धासें स्थगित याःगु खः । बुधवाः स्थगित याःगु मुँज्या बिहीवाः सुथय् च्वनीगु धाःगु दु । मुँज्याय् पदाधिकारीया लिसलिसे निगू खेमाया छुं छुं प्रभावशाली नेतातय्त नापं सतातःगु खः । भातृ संस्था विघटन विवाद ज्यंकेगुया लिसलिसे थप तच्वया वनेवं वरिष्ठ नेता शेरबहादुर देउवा पक्षं छुं दिं न्ह्यः केन्द्रीय समिति मुँज्या नापं बहिष्कार याःगु खः । देउवा पक्षया असहमतिया बाबजुद कोइरालां वंगु असोजय् देउवा पक्षीय नेतृत्व दुगु महिला संघ, तरुण दल व आदिवासी जनजाति संघ लगायतया भातृ संस्था भंग यायेवं विवाद तच्वःगु खः । देउवा पक्षं विघटित भातृ संस्थाया सम्मेलन, आयोजक समिति लगायत पार्टीया मेमेगु निकायलय् सम्मान जनक स्थानया माग याना वयाच्वंगु दु ।