वेपत्ता आयोग गठन या : ओएचसिएचआर
संयुक्त राष्ट्रसंघीय मानवअधिकार उच्चयुक्तया ज्याकू (ओएचसिएचआरं) निदँ न्ह्यः सर्वोच्च अदालतं वेपत्ता यायेगु ज्या सम्बन्धी आयोग गठन यायेत ब्यूगु निर्देशन पालना यायेत सरकारया ध्यानाकर्षण याःगु दु ।
उच्चायुक्तया ज्याकूं आइतवाः पिथंगु विज्ञप्तिइ सर्वोच्चं निदँ न्ह्यः बलपूर्वकक वेपत्ता याइगु ज्यायात अपराधीकरण यायेगु व अन्तर्राष्ट्रिय मापदण्ड अनुकूल जाँचबुझ आयोग गठन यायेत सरकारयात निर्देशन ब्यूसां उकीया कार्यान्वयन जुइ मफूगु खँ न्ह्यथंनातःगु दु ।
सर्वोच्चं वेपत्ता यायेगु ज्याय् जिम्मेवारतय्त अनुसन्धान यानाः कारवाही यायेत, पीडित व उमि छेँजःपिंत पर्याप्त क्षतिपूति व राहत बीत नं सरकारया नांमय् निर्देशन ब्यूगु खः ।
माओवादी सरकारं व्यक्ति बेपत्ता याइगु (कसुर व सजाय) अध्यादेश व्यवस्थापिका संसदय् पेस यासां खूइन्हु दुने उकीयात पारित यायेमाःगु ई पुलेधुंकूगु दु । उच्चायुक्तया ज्याकूथीं थ्व स्वयां न्ह्यः हे बेपत्ता यायेगु ज्याया निंतिं जुइगु सजाय अप्वयेकेत, हदम्यादया ई तनेत व अन्तर्राष्ट्रिय रुपं स्वीकार याःगु परिभाषात नाप ज्वःलाकः बेपत्ता याइगु ज्याया परिभाषायात संशोधन यायेगु लगायत अन्तर्राष्ट्रिय मापदण्ड बमोजिम अध्यादेश हेयेत सरकारयात सिफारिस यायेधुंकूगु दु ।
उच्चायुत्तया ज्याकूथीं बलपूर्वक बेपत्ता यायेगु ज्या पाखें दक्वसिंया संरक्षण सम्बन्धी अन्तर्राष्ट्रिय महासन्धियात अनुमोदन यायेत नं सरकारयात आह्वान याःगु दु ।
