संविधानसभाया म्याद खुला थप
संविधानसभाया म्याद मेगू खुलाया निंतिं थप याःगु दु । संविधानसभाया म्याद थप याःगु थ्व प्यक्वःगु खुसी खः । सर्वोच्च अदालतं आः छक्वः जक संविधानसभाया म्याद थप यायेफइगु आदेश बिउगुलिं म्याद थप यायेगु प्रक्रिया थ्व हे लिप्पांगु खः । सर्वोच्चया आदेश कथं आः थप याःगु इलय् नं संविधान निर्माण जुइमफुसाः संविधानसभा भंग जुइ ।
व्यवस्थापिका संसदय् मंगलवाः ब्वति काःपिं ५०८म्ह सभासद्त मध्ये म्याद थपया पक्षय् ५०५म्हेसिनं मतदान याःगु खःसा राष्ट्रिय प्रजातन्त्र पार्टी नेपालया स्वम्ह सभासद्तय्सं जक विपक्षय् मतदान याःगु खः ।
थ्वस्वयां न्ह्यः मंगलवाः सुथय् सरकारं प्रस्तुत याःगु संविधानसभाया म्याद थप सम्बन्धि संविधान संशोधन प्रस्तावय् माओवादी, कांग्रेस, एमाले व मधेशी मोर्चा दथुइ सहमति जूगु खः । राजनीतिक दलत दथुइ संविधानसभाया म्याद खुला थप यायेगु सहमति जूगु खः ।
