प्रमखें संविधानसभाया म्याद बारे चिधंगु दलत नाप सहलह
संविधानसभाया ई तनेगु व राष्ट्रिय सहमतिया विषयलय् प्रधानमन्त्री डा. बाबुराम भट्टराईं चिधंगु दलया नेतातलिसे सहलह यानादीगु दु । सहलहसं चीधंगु दलतय्सं राष्ट्रिय सहमतिया आधारय् स्पष्ट कार्ययोजना दयेकाः अप्वलय् खुलातक्क ई तनेत प्रधानमन्त्री सुझाव बिउगु दु । संविधानसभाया ई तनेगु विषयलय् सहमति चूलाकेत प्रधानमन्त्री भट्टराईं सोमवाः सिंहदरवारस्थित प्रधानमन्त्रीया ज्याकूथीइ चिधंगु दलतलिसे सहलह यानादीगु खः ।
कांग्रेस व एमालें संविधानसभाया ई तने न्ह्यः हे राष्ट्रिय सहमतिया सरकारया बारे सहमति जुइमाःगु धकाः तःगु शर्तया बारे नं उगु इलय् सहलह जूगु छम्ह नेतां जानकारी बियादिल । राजनीतिक दलतय्सं सहमतिया आधारय् मंगलवाः संविधानसभाया ई तनेत्यंगु दु ।
अथेहे चिधंगु दलतय्सं राज्य पुनर्संरचनाया विषयसं दलिय भागवण्डाया आधरय् दुजःत तःगु व चिधंगु दलया प्रतिनिधित्व मयाकूगु धासें असन्तुष्टी प्वंकूगु खः । प्रधानमन्त्री नाप सहलहसं झिंनिगू चिधंगु दलतय् ब्वति दुगु खः ।
