आदिवासी जनजातितय्सं सशक्त आन्दोलन यायेगु ख्याच्वः

आदिवासी हकहित व अधिकारयात राज्य पुनर्संरचनां बेवास्ता याःसा नेपाःया आदिवासी जनजातितय्सं सशक्त आन्दोलन यायेगु ख्याच्वः बिउगु दु । आदिवासी जनजाति नेतातय्सं थीथी पार्टीइ आदिवासी जनजातित विभक्त जूगुलिं मधेशीतय्सं थें थःपिंसं सरकारयात थःगु अनुकुल यंकेमफुगु खँ धाःगु दु । आदिवासी मिसा न्ह्यलुवाःतय्सं सोमवाः ग्वसाःग्वःगु 'राज्य पुनर्संरचना व आदिवासी जनजातिया भूमिका' विषयक अन्तक्रिया ज्याझ्वलय् वय्कःपिंसं उगु खँ न्ह्यथंगु खः ।

ज्याझ्वलय् नेकपा (एमाले)या नेता लिसे आदिवासी सभासदतय्गु ककसया नायः पृथ्वी सुब्बा गुरुङं आदिवासी जनजातितय्त हाकनं अपेक्षित यानाः न्हूगु संविधान हयेत कुतः जूसा थःपिंसं अज्याःगु संविधान गवलें पिथने मबिइगु धयादिल । वय्कलं नेपालय् औपचारिक व उदार प्रजातन्त्र स्वयाः नं दीगो प्रजातन्त्र माःगु धयादिसें आदिवासी जनजातिया अधिकार पलिस्था यायेत हाथ्या दुगु धयादिल ।

ज्याझ्वलय् नेपाः राष्ट्रिय पार्टीया नायः डा. केशवमान शाक्यं आदिवासीतय्गु हक अधिकारयात प्रत्याभूत यायेत आदिवासी पार्टी हे माःगु व मिसातय्गु अधिकारया निंतिं नं मिसा पार्टी हे माःगु खँय् बः बियादिल । नर्वेसं न्हापा मिसातय्सं हे सरकारया नेतृत्व याःगु व आः नं थीथी सरकारी पदय् मिसातय्गु ब्वति दुगु न्ह्यःथनादिसें वय्कलं नेपालय् जनसंख्याया आधारय् न्यय्छगू प्रतिशतया समानुपातिकता मिसातय्त माःगु न्ह्यथनादिल ।

अथेहे प्रा. डा. कृष्ण भट्टचनं न्हापाया इलय् आदिवासीतय्गु जनसंख्याया अनुपातय् म्हो प्रतिनिधित्व दुगुलिं आः समानुपातिकताया हिसावं प्रतिनिधित्व जूसाः जक आदिवासीतय् हक अधिकार पलिस्था यायेफइगु धयादिल । 'निसः व पीदँतक्क किसि छुं व छुं किसि जुयाः सरकारय् च्वनः' वय्कलं धयादिल, 'उकिं आः किसि किसि हे व छुं छुं हे जुइमाः ।'

तामाङ बुद्धिजीवी पर्शुराम तामाङं छुं छुं वामपन्थी पार्टीतय्सं आदिवासीया हकअधिकार प्रत्याभूत जुइगु कथंया राज्य मदयेकेमाः धइगु मनतुनाच्वंगु प्रति आपत्ति प्वंकादिल । वय्कलं आदिवासी जनजातितय्त थःगु हक अधिकारपाखें बञ्चित यायेत न्ह्यःज्यानाच्वंगु द्वपं नापं बियादिल ।

ज्याझ्वलय् डा. ओम गुरुङ, आदिवासी जनजाति महासंघया नायः राजकुमार लेखी, सभासद पासाङ शेर्पा व आदिवासी मिसा न्ह्यलुवाः सोनी लामा लगायतपिंसं थःथःगु बिचाः प्वंकादीगु खःसा डा. चैतन्य सुब्बां ज्यापौ न्ह्यब्वयादीगु खः ।