थःपिनिगु सामान तंगु बारे विदेशीतय्सं प्रमयात गुनासो प्वंकल
गुक्वःगु हस्तकला व्यापार मेलाय् ब्वति कायेत वःपिं विदेशीतय्सं येँया अन्तर्राष्ट्रय विमानस्थलय् थःपिनिगु सामान खुयायंकूगु गुनासो प्रधानमन्त्री डा. बाबुराम भट्टराईयात प्वंकूगु दु ।
वंगु बिहिवाःनिसें न्ह्याःगु प्रर्दशनीया थौं लिपांगु दिं अवलोकन यायेत भृकुटीमण्डपसं च्वंगु भेलास्थल थ्यंकादीम्ह प्रधानमन्त्री भट्टराईलिसे विदेशी सहभागीतय्सं सामान तंगु गुनासो न्यंकूगु खः । पाकिस्तानया सायरा बानुं मेलाय् ब्वति कायेत वयेगु झ्वलय् त्रिभुवन अन्तर्राष्ट्रिय विमानस्थल भन्सार ज्याकुथिइ थःगु न्यय्द्वः तका बराबरया सामान खुयायंकूगु जानकारी बिउगु खः । बानुं थःगु खुयायंकूगु सामानया विषयलय् भन्सार अधिकृतया न्ह्यःने गुनासो तयागु इलय् अखःतं सामानया नं निदुगं दस्तुर काःगु धयादिल ।
अथेहे पाकिस्तानया हे एफएफएस कलेक्सनया फाइजा रिजनीं नं त्रिभुवन अन्तर्राष्ट्रिय विमानस्थल भन्सार ज्याकुपाखें थःगु सामान तंगु धयादीगु खः ।
विदेशीतय् गुनासो न्यनेधुंकाः प्रधानमन्त्री भट्टराईं भन्सार ज्याकुथिं काःगु निदुगं दस्तुर लिसे खुयायंकूगु बारे याकनं थुइका कारवाही यायेत प्रधानमन्त्री लिसे मन्त्रिपरिषद् ज्याकूया सचिव लिलामणी पौड्यालयात निर्देशन बियादिल ।
मेलाय् पाकिस्तानया नीगू, बंगलादेशया झिगू व मेमेगु देय्या यानाः निसःगू प्रदर्शन तयातःगु खः ।
