सतक दुर्घटनाय् पत्रकार सहित निम्ह सित
रुपन्देहीया सालझण्डीइ थौं छगू सतक दुर्घटनाय् लानाः छम्ह पत्रकार सहित निम्ह सीगु दु । दुर्घटनाय् मेपिं स्वम्ह घाःपाः जूगु दु । कारय् सवार कारोबार न्हिपौया ३५दँया समाचार सम्पादक विजयबाबु खत्री व साइकल चालक सालझण्डी ४या ४०दँया पूर्ण बहादुर थारु सीगु खः । येँ ताः ई न्ह्यःनिसें पत्रकारिता पेसाय् संलग्न खत्री रुपन्देही करहीया गाविस ३या स्थायी निवासी खः ।
दुर्घटनाय् लानाः घाःपाः जूम्ह थारुयात वासः याकेत अस्पताल यंकाच्वंगु इलय् लँय् मदुगु खःसा पत्रकार खत्री लुम्बिनी अञ्चल अस्पताल बुटवलय् वासः याकेगु झ्वलय् मदुगु जानकारी पश्चिम क्षेत्रीय ट्राफिक प्रहरी ज्याकू बुटवलं बिउगु दु । पश्चिमं पूर्वपाखे वयाच्वंगु बा.७.च. ५९२ नम्बरया कारं सोमवाः न्हिनय् ४ बजे पूर्वपश्चिम राजमार्ग अन्तर्गत सालझण्डीइ दुर्घटना जूगु खः ।
