आयोगया न्हापांगु मुँज्या च्वन
राज्य पुनर्संरचना आयोगया न्हापांगु मुँज्या आइतवाः च्वंगु दु । आयोगया दुजः मल्ल के सुन्दर (कृष्ण सुन्दर मल्ल)या अध्यक्षताय् उगु मुँज्या च्वंगु खः ।
मुँज्यां थुगु आयोगया नां राज्य पुनर्संरचना सुझाव उच्चस्तरीय आयोग धकाः क्वःछिउगु दुसाः आयोगया प्रवक्ताय् कृष्ण हाछेथुयात नियुक्त याःगु दु । मुँज्याय् आयोगया कार्यविधि बारे सहलह जूसां उगु कार्यविधि सोमवाः जक सार्वजनिक याइगु जूगु दु । च्याम्ह हे दुजःत सहित च्वंगु न्हापांगु मुँज्यां जनतायात राज्य पुनर्संरचनाया बारे सुझाव बियाः ग्वाहालि यायेत नं इनाप याःगु दु ।
आयोगया मेगू मुँज्या सोमवाः न्हिनय् १ बजे यलया जवलाख्यःस्थित स्टाफ कलेजय् च्वंगु आयोगया ज्याकूथी च्वनीगु जूगु दु । सोमवाः च्वनीगु मुँज्या धाःसा कृष्ण हाछेथुया अध्यक्षताय् च्वनी । सरकारं आयोग नीस्वंगु इलय् राजनीतिक दलत दथुइ संयोजकया नांमय् सहमति मजूगुलिं देवनागरी वर्णाक्रम कथं मुँज्याया अध्यक्षता यायेगु निर्णय याःगु खः ।
