अख्तियारं सिंचाई मन्त्री यादवयात सःतल
अख्तियार दुरुपयोग अनुसन्धान आयोगं घुस फ्वंगु द्वपं लानाच्वंम्ह सिंचाईमन्त्री महेन्द्र यादवयात सःतूगु दु । भ्रष्टाचार मुक्त प्रशासन व मितव्ययिताया नारा थ्वयेका वयाच्वंम्ह प्रधानमन्त्री डा. बाबुराम भट्टराईया मन्त्री परिषद्या दुजःतय्त अख्तियार दुरुपयोग अनुसन्धान आयोगं छानबिनया निंतिं सःतूगु खः ।
मन्त्री यादवं ज्याझ्वः स्वीकृत याःगु बापत छगू प्रतिशत धेबा फ्वंगु बारे छानबिन यायेत सिंचाईमन्त्री यादवयात सःतूगु खः । आयोगं आइतवाः छगू विज्ञप्ती पिथनाः सिंचाईमन्त्री यादवयात मन्त्रालय स्तरया फुक्क ज्याझ्वःत स्वन्हुया दुने स्वीकृत यायेत व उकिया जानकारी आयोगयात बिइत निर्देशन नापं बिउगु दु ।
ठेक्का बिइमाःगु ज्याझ्वःत ई बिइधुंकाः नापं थःत छगू प्रतिशत धेबा मबितल्ले स्वीकृत मयागु धइगु उजुरीया आधारय् अख्तियारं उगु निर्णय याःगु खः । आयोगं स्वन्हुयादुने ज्याझ्वः स्वीकृत मजूसा प्रधानमन्त्रीपाखें विभागीय मन्त्री व सचिवयात फुक्क भ्वंत नापं छानबिनया निंतिं आयोगय् छ्वयाः बिइत विज्ञप्तीपाखें इनाप याःगु दु ।
